ദുബായ്: സുരക്ഷാ കാരണങ്ങളാൽ പ്രവർത്തനം നിർത്തിവെച്ചിരുന്ന ദുബായ് അന്താരാഷ്ട്ര വിമാനത്താവളവും അൽ മക്തൂം അന്താരാഷ്ട്ര വിമാനത്താവളവും വീണ്ടും തുറന്നു. വ്യോമപ്രതിരോധ സംവിധാനങ്ങൾ ജാഗ്രത തുടരുന്നതിനിടെ, സ്ഥിതിഗതികൾ നിയന്ത്രണവിധേയമാണെന്ന് ഉറപ്പുവരുത്തിയ ശേഷമാണ് അധികൃതർ വിമാനങ്ങൾ പറന്നുയരാൻ അനുമതി നൽകിയത്. വിമാനത്താവളത്തിന്റെ ഔദ്യോഗിക എക്സ് അക്കൗണ്ടിലൂടെയാണ് ഈ വിവരം അറിയിച്ചത്.(Relief for passengers, Dubai Airport reopens after temporary closure)
താൽക്കാലികമായി റദ്ദാക്കിയിരുന്ന സർവീസുകൾ പുനരാരംഭിക്കുമെന്ന് എമിറേറ്റ്സ് എയർലൈൻസ് അറിയിച്ചു. ഇന്ന് ഉച്ചയ്ക്ക് ശേഷമുള്ള വിമാനങ്ങളിൽ ടിക്കറ്റ് കൺഫേം ആയ യാത്രക്കാർക്ക് വിമാനത്താവളത്തിലേക്ക് എത്തിച്ചേരാം. ദുബായ് വഴി മറ്റ് രാജ്യങ്ങളിലേക്ക് പോകുന്ന യാത്രക്കാർക്ക്, അവരുടെ തുടർന്നുള്ള വിമാനങ്ങൾ ഷെഡ്യൂൾ ചെയ്തിട്ടുണ്ടെങ്കിൽ യാത്ര തുടരാവുന്നതാണ്.
യാത്രക്കാരുടെയും ജീവനക്കാരുടെയും സുരക്ഷ കണക്കിലെടുത്ത് വരും ദിവസങ്ങളിലെ വിമാന ഷെഡ്യൂളുകളിൽ മാറ്റം വരുത്തിയേക്കാം. സാഹചര്യം സൂക്ഷ്മമായി നിരീക്ഷിച്ചു വരികയാണെന്നും എയർലൈൻ അറിയിച്ചു. വിമാനത്താവളത്തിലേക്ക് പുറപ്പെടുന്നതിന് മുൻപ് തങ്ങളുടെ വിമാനത്തിന്റെ കൃത്യമായ സമയവിവരങ്ങൾ വിമാനക്കമ്പനികളുടെ വെബ്സൈറ്റോ ആപ്പോ വഴി പരിശോധിക്കണമെന്ന് അധികൃതർ നിർദ്ദേശിച്ചു.
