വാഷിങ്ടൺ: ഇറാൻ ആണവായുധം നിർമ്മിക്കുന്നത് തടയാൻ ഏതറ്റം വരെയും പോകുമെന്ന് യുഎസ് പ്രസിഡന്റ് ഡൊണാൾഡ് ട്രംപ് (Donald Trump Iran War Speech). വൈറ്റ് ഹൗസിലെ ഈസ്റ്റ് റൂമിൽ മാധ്യമങ്ങളെ കണ്ട അദ്ദേഹം, ഇറാന്റെ സൈനിക-ആണവ ശേഷി നശിപ്പിക്കുക എന്ന ലക്ഷ്യത്തോടെ ആരംഭിച്ച സൈനിക നീക്കം അടുത്ത നാല് മുതൽ അഞ്ച് ആഴ്ച വരെ തുടരുമെന്ന് പ്രഖ്യാപിച്ചു. യുദ്ധം തുടങ്ങിയ ശേഷം ആദ്യമായാണ് ട്രംപ് മാധ്യമങ്ങൾക്ക് മുന്നിലെത്തുന്നത്.
ഇറാൻ ആണവസമ്പുഷ്ടീകരണത്തിന്റെ വക്കിലാണെന്നും ഇത് ലോകത്തിന് മുഴുവൻ ഭീഷണിയാണെന്നും ട്രംപ് പറഞ്ഞു. പലതവണ മുന്നറിയിപ്പ് നൽകിയിട്ടും ഇറാൻ പിന്മാറാത്തതിനാലാണ് ആക്രമണം അനിവാര്യമായതെന്ന് അദ്ദേഹം ന്യായീകരിച്ചു.
ഇറാന്റെ മിസൈൽ പ്രഹരശേഷി പൂർണ്ണമായും തകർക്കുക, ഇറാന്റെ നാവികപ്പടയെ നശിപ്പിക്കുക (ഇതിനോടകം പത്ത് ഇറാനിയൻ കപ്പലുകൾ മുക്കിയതായി ട്രംപ് അവകാശപ്പെട്ടു), ഇറാൻ ആണവായുധം കൈക്കലാക്കുന്നില്ലെന്ന് ഉറപ്പാക്കുക തുടങ്ങിയ കാര്യങ്ങളാണ് യുദ്ധത്തിലൂടെ ലക്ഷ്യമിടുന്നതെന്നും ട്രംപ് പറഞ്ഞു. അമേരിക്കയ്ക്ക് എത്രകാലം വേണമെങ്കിലും യുദ്ധം തുടരാനുള്ള കരുത്തുണ്ടെന്നും ഇറാന്റെ ഭീഷണി ഇല്ലാതാക്കാനുള്ള അവസാന അവസരമാണിതെന്നും അദ്ദേഹം കൂട്ടിച്ചേർത്തു.
ട്രംപിന്റെ പ്രഖ്യാപനത്തോടെ പശ്ചിമേഷ്യയിലെ സംഘർഷം കൂടുതൽ സങ്കീർണ്ണമായേക്കും. അമേരിക്കൻ നാവികസേന ഇറാനിയൻ തീരങ്ങളിൽ ശക്തമായ ആക്രമണം തുടരുകയാണെന്നാണ് റിപ്പോർട്ടുകൾ സൂചിപ്പിക്കുന്നത്.
Story Summary: US President Donald Trump justified the joint military action with Israel against Iran, stating it is necessary to prevent Iran from acquiring nuclear weapons. In his first press conference since the conflict began, Trump announced that the war would continue for another 4 to 5 weeks to neutralize Iran’s missile and naval capabilities. He claimed that 10 Iranian ships have already been sunk.
