Follow on Google News
കൊച്ചി: ഓട്ടിസത്തെക്കുറിച്ചുള്ള അവബോധം വളർത്തുന്നതിനും ഈ വിഭാഗത്തിലുള്ളവരുടെ കഴിവുകൾ പ്രോത്സാഹിപ്പിക്കുന്നതിനുമായി ആസ്റ്റർ മെഡ്സിറ്റി ടാലന്റ് ഷോ സംഘടിപ്പിച്ചു (Aster Medcity Autism Awareness Day 2026). ലോക ഓട്ടിസം അവബോധ ദിനത്തിന്റെ ഭാഗമായി ആസ്റ്ററിലെ കിഡ്സ് ഇന്റഗ്രേറ്റഡ് ന്യൂറോ ഡെവലപ്മെന്റൽ സെന്ററിന്റെ (KIND) നേതൃത്വത്തിലായിരുന്നു പരിപാടി.
ഓട്ടിസമുള്ള വ്യക്തികളുടെ സവിശേഷമായ കഴിവുകൾ പുറത്തെടുക്കുന്ന ടാലന്റ് ഷോയും കലാ സെഷനുകളും രക്ഷിതാക്കൾക്കും കുട്ടികൾക്കും പുത്തൻ അനുഭവമായി. എറണാകുളം ഓട്ടിസം ക്ലബ്ബിന്റെ ‘ഓസം ബൈറ്റ്സ്’ തയ്യാറാക്കിയ പലഹാരങ്ങൾ, ‘ലൂയിസ് കാൻഡിൽസ്’ നിർമ്മിച്ച സുഗന്ധ മെഴുകുതിരികൾ എന്നിവയുടെ പ്രദർശനവും വിൽപനയും നടന്നു.
സംസാരശേഷിക്ക് പരിമിതികളുള്ള എഴുത്തുകാർ രചിച്ച ‘ടോക്കിങ് ഫിംഗേഴ്സ്’ എന്ന പുസ്തകം പരിപാടിയിലെ പ്രധാന ആകർഷണമായിരുന്നു. കുട്ടികൾക്കും രക്ഷിതാക്കൾക്കുമായി കുസാറ്റിലെ ഡോ. ബേബി ചക്രപാണി നടത്തിയ പ്രഭാഷണവും സ്മൃതി സന്തോഷിന്റെ ക്രിയേറ്റീവ് ആർട്ട് സെഷനും സംഘടിപ്പിച്ചു. ഡേ ഡ്രീംസ് വൊക്കേഷണൽ ട്രെയിനിംഗ് സെന്ററിലെ കുട്ടികളുടെ കലാസൃഷ്ടികളും പ്രദർശിപ്പിച്ചു.
ആസ്റ്റർ മെഡ്സിറ്റി സിഇഒ ഡോ. നളന്ദ ജയദേവ്, ഡോ. ജീസൺ സി. ഉണ്ണി, ഡോ. അനിത വിജയൻ, ഡോ. മരിയ ഗ്രേസ് ട്രീസ എന്നിവർ ചടങ്ങിൽ സംബന്ധിച്ചു. ഐഎപി കൊച്ചി പ്രസിഡന്റ് ഡോ. വിജയൻ കെ. ജി., സെക്രട്ടറി ഡോ. സത്യജിത്ത് നായർ, റോട്ടറി ക്ലബ്ബ് പ്രതിനിധി ജെ.ജെ. തോമസ് എന്നിവരും പരിപാടിയുടെ ഭാഗമായി.
ഓട്ടിസമുള്ള വ്യക്തികളെ സമൂഹത്തിന്റെ മുഖ്യധാരയിലേക്ക് കൊണ്ടുവരുന്നതിനും അവരുടെ സർഗ്ഗാത്മകതയെ അംഗീകരിക്കുന്നതിനും ഇത്തരം പരിപാടികൾ വലിയ പങ്കുവഹിക്കുമെന്ന് സംഘാടകർ വ്യക്തമാക്കി.
Story Summary:
Aster Medcity’s Kids Integrated Neuro Developmental Centre (KIND) organized a talent show to mark World Autism Awareness Day. The event showcased the diverse skills of individuals with autism through art sessions, experience sharing, and a product exhibition featuring snacks by Ernakulam Autism Club and candles by Louise Candles. A highlight was the book ‘Talking Fingers,’ authored by non-verbal individuals. Experts like Dr. Baby Chakrapani and art therapist Smrithi Santhosh conducted sessions for children and parents.
