ചെന്നൈ: സിനിമാ പ്രൊമോഷന്റെ ഭാഗമായി കോളജുകളിലും വിദ്യാഭ്യാസ സ്ഥാപനങ്ങളിലും പോകുന്ന രീതിയെ വിമർശിച്ച് തമിഴ് താരം ശശികുമാർ (Sasikumar Actor). വിദ്യാർത്ഥികൾ സിനിമാതാരങ്ങളെ കാണാൻ വരുന്നവരാണെന്നും അത് സിനിമയുടെ വിജയത്തെ ബാധിക്കില്ലെന്നും അദ്ദേഹം പറഞ്ഞു. ഒരു സിനിമ വിജയിക്കുന്നത് അതിന്റെ ഗുണമേന്മയുള്ള ഉള്ളടക്കത്തിലൂടെ മാത്രമാണെന്നും താരം കൂട്ടിച്ചേർത്തു.
കോളജുകൾ വിദ്യാഭ്യാസത്തിന് മാത്രമുള്ളതാണ്. നിർമ്മാതാക്കളുടെ നിർബന്ധം മൂലമല്ലാതെ താൻ ഇത്തരം പരിപാടികളിൽ പങ്കെടുക്കാറില്ല. കുട്ടികൾ ആ നിമിഷം ആസ്വദിച്ചിട്ട് പോകും, പക്ഷേ അവർക്ക് പഠനത്തിനായിരിക്കണം പ്രഥമ പരിഗണന നൽകേണ്ടത്. പ്രൊമോഷൻ തന്ത്രങ്ങൾ കൊണ്ട് ഒരു സിനിമയും വിജയിക്കില്ല. മികച്ച അഭിപ്രായങ്ങൾ (Word of mouth) ഉണ്ടെങ്കിൽ മാത്രമേ സിനിമ ജനങ്ങൾ ഏറ്റെടുക്കൂ. വിദ്യാർത്ഥികൾ വരുന്നത് താരങ്ങളെ കാണാനാണ്. അത് സിനിമയുടെ കളക്ഷനെ ബാധിക്കണമെന്നില്ല- അദ്ദേഹം പറഞ്ഞു.
ഫെബ്രുവരി 13-നാണ് ശശികുമാർ നായകനാകുന്ന ‘മൈ ലോർഡ്’ തീയേറ്ററുകളിൽ എത്തിയത്. ചൈത്ര ജെ. ആച്ചർ നായികയാകുന്ന ചിത്രത്തിൽ മലയാള താരം ആശ ശരത്, ഗുരു സോമസുന്ദരം തുടങ്ങിയവർ പ്രധാന വേഷങ്ങളിൽ എത്തുന്നുണ്ട്.
