മുംബൈ: സോഷ്യൽ മീഡിയയിൽ കുറച്ചു ദിവസങ്ങളായി പ്രചരിക്കുന്ന ധനുഷ് – മൃണാൾ താക്കൂർ വിവാഹ വാർത്തകളിൽ ആദ്യമായി മനസ്സ് തുറന്ന് നടി മൃണാൾ താക്കൂർ (Dhanush Mrunal Thakur Wedding). ഫെബ്രുവരി 14-ന് വിവാഹം നടക്കുമെന്ന റിപ്പോർട്ടുകൾ ശ്രദ്ധയിൽപ്പെട്ടോ എന്ന ചോദ്യത്തിന്, “വിവാഹം പ്രഖ്യാപിച്ചിട്ടുണ്ടോ? എന്നെ ആരും അതിലേക്ക് ക്ഷണിച്ചില്ലല്ലോ, അവർക്ക് എന്നെക്കൂടി ക്ഷണിക്കാമായിരുന്നു” എന്നായിരുന്നു താരത്തിന്റെ പരിഹാസം കലർന്ന മറുപടി.
തന്റെ വിവാഹത്തെക്കുറിച്ച് വാർത്തകൾ ചമയ്ക്കുന്നവർ സത്യത്തിൽ തനിക്ക് സൗജന്യ പി.ആർ (Public Relations) ആണ് ചെയ്തുതരുന്നതെന്നും അതിൽ നന്ദിയുണ്ടെന്നും മൃണാൾ പറഞ്ഞു. ഇത്തരം വാർത്തകൾ കണ്ട് താൻ ചിരിക്കാറുണ്ടെന്നും താരം കൂട്ടിച്ചേർത്തു. “നിങ്ങൾ വിചാരിക്കുന്നതുപോലെയല്ല കാര്യങ്ങൾ. അത് ഫെബ്രുവരി 14-ന് നിങ്ങൾക്ക് തന്നെ കാണാൻ കഴിയും” എന്നും താരം വ്യക്തമാക്കിയതോടെ വിവാഹ വാർത്തകൾ വെറും അഭ്യൂഹങ്ങൾ മാത്രമാണെന്ന് ഉറപ്പായി.
‘സൺ ഓഫ് സർദാർ 2’ പ്രീമിയറിന് ഇരുവരും ഒന്നിച്ചെത്തിയതോടെയാണ് പ്രണയവാർത്തകൾക്ക് തുടക്കമായത്. മൃണാളിന്റെ ജന്മദിന ആഘോഷത്തിൽ ധനുഷ് പങ്കെടുത്തതും, ധനുഷിന്റെ ‘തേരെ ഇഷ്ക് മേം’ സക്സസ് പാർട്ടിയിൽ മൃണാൾ അതിഥിയായെത്തിയതും ഗോസിപ്പുകൾക്ക് ആക്കം കൂട്ടി.
വിവാഹവാർത്തകൾ വ്യാജമാണെന്ന് ധനുഷിന്റെ അടുത്ത വൃത്തങ്ങൾ ഡി.എൻ.എയോട് (DNA) പ്രതികരിച്ചു. എന്നാൽ ധനുഷ് ഇതുവരെ ഔദ്യോഗികമായി പ്രതികരിച്ചിട്ടില്ല.
തങ്ങൾ നല്ല സുഹൃത്തുക്കൾ മാത്രമാണെന്നാണ് മൃണാൾ ആവർത്തിച്ചു വ്യക്തമാക്കുന്നത്.
