കൊച്ചി: ‘തുടരും’ എന്ന സൂപ്പർഹിറ്റിന് ശേഷം തരുൺ മൂർത്തി സംവിധാനം ചെയ്യുന്ന പുതിയ മോഹൻലാൽ ചിത്രത്തിൽ മീരാ ജാസ്മിൻ നായികയാകുന്നു (Mohanlal Tarun Moorthy Movie). മീരയുടെ ജന്മദിനത്തോടനുബന്ധിച്ചാണ് അണിയറപ്രവർത്തകർ ഔദ്യോഗിക പോസ്റ്റർ പുറത്തുവിട്ടത്. ചിത്രത്തിൽ ‘നൈസി’ എന്ന കഥാപാത്രത്തെയാണ് മീര അവതരിപ്പിക്കുന്നത്.
മോഹൻലാൽ ‘ലൗലാജൻ’ എന്ന പോലീസ് ഉദ്യോഗസ്ഥനായി എത്തുമ്പോൾ, അദ്ദേഹത്തിന്റെ നായികയായ ‘നൈസി’യായാണ് മീരാ ജാസ്മിൻ വേഷമിടുന്നത്. “ലൗലാജന്റെ നൈസി” എന്ന ക്യാപ്ഷനോടെ തരുൺ മൂർത്തി തന്നെയാണ് പോസ്റ്റർ പങ്കുവെച്ചത്.
2006-ലെ ‘രസതന്ത്ര’ത്തിന് ശേഷം മലയാളികൾ നെഞ്ചിലേറ്റിയ കോമ്പോയാണ് മോഹൻലാൽ-മീര ജാസ്മിൻ. ഇന്നത്തെ ചിന്താവിഷയം, ലേഡീസ് ആൻഡ് ജെന്റിൽമാൻ തുടങ്ങിയ ചിത്രങ്ങൾക്ക് ശേഷം ഇരുവരും നായികാനായകന്മാരായി വീണ്ടും ഒന്നിക്കുന്നു എന്ന പ്രത്യേകത ഈ ചിത്രത്തിനുണ്ട്.
ആഷിഖ് ഉസ്മാൻ നിർമ്മിക്കുന്ന ഈ ചിത്രത്തിന് (L366) രതീഷ് രവിയാണ് തിരക്കഥയൊരുക്കുന്നത്. ഷാജി കുമാർ ഛായാഗ്രഹണവും ജേക്സ് ബിജോയ് സംഗീതവും നിർവ്വഹിക്കുന്നു. ചിത്രത്തിന്റെ പേര് ഇതുവരെ ഔദ്യോഗികമായി പ്രഖ്യാപിച്ചിട്ടില്ല. മീശപിരിച്ച് പോലീസ് ഷൂസുമായി നിൽക്കുന്ന മോഹൻലാലിന്റെ ഫസ്റ്റ് ലുക്ക് നേരത്തെ തന്നെ തരംഗമായിരുന്നു. ബിനു പപ്പു, വിവേക് ഹർഷൻ, വിഷ്ണു ഗോവിന്ദ് തുടങ്ങിയ പ്രമുഖരും അണിയറയിൽ അണിനിരക്കുന്നുണ്ട്.
