തിരുവനന്തപുരം: പാചകവാതക ലഭ്യത കുറഞ്ഞതോടെ ഹോട്ടലുകളും തട്ടുകടകളും കൂട്ടത്തോടെ അടച്ചുപൂട്ടുന്നത് അന്യസംസ്ഥാന തൊഴിലാളികളുടെ കൂട്ടപ്പലായനത്തിന് കാരണമാകുന്നു (Migrant labor shortage Kerala 2026). ബംഗാൾ, അസം സംസ്ഥാനങ്ങളിൽ നടക്കാനിരിക്കുന്ന നിയമസഭാ തെരഞ്ഞെടുപ്പും റംസാൻ ആഘോഷങ്ങളും ഈ മടക്കയാത്രയുടെ ആക്കം കൂട്ടിയിരിക്കുകയാണ്.
വാണിജ്യ സിലിണ്ടറുകൾ കിട്ടാതായതോടെ ഹോട്ടൽ മേഖല സ്തംഭിച്ചു. ഇതോടെ ഈ രംഗത്ത് ജോലി ചെയ്തിരുന്ന ആയിരക്കണക്കിന് തൊഴിലാളികൾക്ക് വരുമാനം നിലച്ചു. സ്വന്തമായി ഭക്ഷണം പാകം ചെയ്യാൻ ഉപയോഗിച്ചിരുന്ന ചെറിയ സിലിണ്ടറുകൾ വിപണിയിൽ നിന്ന് അപ്രത്യക്ഷമായതും ഇവരെ ദുരിതത്തിലാക്കി.ബംഗാൾ, അസം സംസ്ഥാനങ്ങളിലെ വോട്ടർ പട്ടിക പുതുക്കുന്നതും തെരഞ്ഞെടുപ്പും പ്രമാണിച്ച് വോട്ട് രേഖപ്പെടുത്താൻ തൊഴിലാളികൾ നാട്ടിലേക്ക് മടങ്ങാൻ തീരുമാനിച്ചിരുന്നതാണ്. റംസാൻ കൂടി അടുത്തതോടെ ഇവർ യാത്ര നേരത്തെയാക്കി.
തിരുവനന്തപുരത്തെ പ്രമുഖ മാളുകളിൽ ഉൾപ്പെടെ തൊഴിലാളികളുടെ എണ്ണത്തിൽ വൻ കുറവുണ്ടായതായി ഏജൻസികൾ സാക്ഷ്യപ്പെടുത്തുന്നു. 25 പേർ ഉണ്ടായിരുന്ന സ്ഥാനത്ത് ഇപ്പോൾ പലയിടത്തും അഞ്ചോ ആറോ പേർ മാത്രമാണുള്ളത്.കേരളത്തിലെ നിർമ്മാണ മേഖല, കൃഷി, ചെങ്കൽ ഖനനം, പരമ്പരാഗത പലഹാര നിർമ്മാണം എന്നിവയെല്ലാം അന്യസംസ്ഥാന തൊഴിലാളികളെയാണ് പ്രധാനമായും ആശ്രയിക്കുന്നത്. തെങ്ങ് ചെത്ത് പോലുള്ള പ്രാദേശിക നൈപുണ്യം വേണ്ട മേഖലകളിൽ പോലും ഇവരുടെ സേവനം നിർണ്ണായകമാണ്. ഇവർ മടങ്ങുന്നത് ഈ മേഖലകളെ പൂർണ്ണമായും നിശ്ചലമാക്കുമോ എന്ന ആശങ്കയിലാണ് ഉടമകൾ.
നിലവിൽ ബംഗാൾ, അസം റൂട്ടുകളിലെ ട്രെയിനുകൾ ആഴ്ചകളോളം നീളുന്ന വെയിറ്റിംഗ് ലിസ്റ്റിലാണ്. ഒരിക്കൽ മടങ്ങിയാൽ മാസങ്ങൾക്ക് ശേഷമേ ഇവർ തിരിച്ചെത്തൂ എന്നത് കേരളത്തിന്റെ സമ്പദ്വ്യവസ്ഥയെയും നിർമ്മാണ പ്രവർത്തനങ്ങളെയും പ്രതികൂലമായി ബാധിക്കും.
Story Summary: The ongoing fuel and LPG crisis in Kerala has triggered a mass exodus of migrant workers. With hotels shutting down and small LPG cylinders unavailable, workers from West Bengal and Assam are returning home earlier than planned, coinciding with upcoming state elections and Ramadan. This has led to a severe labor shortage across construction, agriculture, and hospitality sectors.
