താനെ: മുംബൈയിലെ മുളുണ്ട് വെസ്റ്റിൽ നിർമ്മാണത്തിലിരുന്ന മെട്രോ ലൈൻ 4-ന്റെ തൂണിൽ നിന്ന് വൻ കോൺക്രീറ്റ് സ്ലാബ് താഴേക്ക് വീണുണ്ടായ അപകടത്തിൽ നാലുപേർക്ക് പരിക്കേറ്റു (Mumbai Metro Accident). ശനിയാഴ്ച ഉച്ചയോടെ എൽ.ബി.എസ് മാർഗിലാണ് നാടിനെ നടുക്കിയ ഈ സംഭവം നടന്നത്.
മെട്രോ തൂണിലെ നിർമ്മാണത്തിന്റെ ഭാഗമായുള്ള വലിയ കോൺക്രീറ്റ് പാളി താഴെ റോഡിലൂടെ പോവുകയായിരുന്ന വാഹനങ്ങൾക്ക് മുകളിലേക്ക് പതിക്കുകയായിരുന്നു. ഒരു ഓട്ടോറിക്ഷയും കാറും സ്ലാബിനടിയിൽപ്പെട്ട് പൂർണ്ണമായും തകർന്നു. ഓട്ടോ ഡ്രൈവറും കാറിലുണ്ടായിരുന്ന യാത്രക്കാരും അവശിഷ്ടങ്ങൾക്കിടയിൽ കുടുങ്ങിപ്പോയി. തുടർന്ന് അഗ്നിശമന സേനയും പോലീസും ചേർന്ന് നാട്ടുകാരുടെ സഹായത്തോടെ ഇവരെ പുറത്തെടുത്തു. പരിക്കേറ്റവരെ ഉടൻ തന്നെ അടുത്തുള്ള ആശുപത്രിയിൽ പ്രവേശിപ്പിച്ചു. ഇതിൽ രണ്ടുപേരുടെ നില ഗുരുതരമാണെന്നാണ് റിപ്പോർട്ടുകൾ.
അപകടത്തിന്റെ നടുക്കുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. രക്തത്തിൽ കുളിച്ച നിലയിലുള്ള ഓട്ടോ ഡ്രൈവറെ നാട്ടുകാർ പുറത്തെടുക്കുന്നത് ദൃശ്യങ്ങളിൽ കാണാം.മെട്രോ നിർമ്മാണത്തിനിടെ മതിയായ സുരക്ഷാ ക്രമീകരണങ്ങൾ പാലിക്കാത്തതാണ് അപകടത്തിന് കാരണമെന്ന് ആരോപണമുയർന്നിട്ടുണ്ട്. സംഭവത്തെക്കുറിച്ച് വിശദമായ അന്വേഷണം നടത്താൻ മെട്രോ അധികൃതർ ഉത്തരവിട്ടു.
തിരക്കേറിയ എൽ.ബി.എസ് മാർഗിൽ അപകടത്തെത്തുടർന്ന് വൻ ഗതാഗതക്കുരുക്ക് അനുഭവപ്പെട്ടു. സ്ലാബും വാഹനങ്ങളും നീക്കം ചെയ്ത് ഗതാഗതം പുനഃസ്ഥാപിക്കാനുള്ള ശ്രമങ്ങൾ വൈകുന്നേരം വരെ തുടർന്നു.
