ആലപ്പുഴ: തൃക്കുന്നപ്പുഴയിൽ ക്ഷേത്രോത്സവത്തിനിടെയുണ്ടായ ഗുണ്ടാ സംഘർഷത്തിൽ കർശന നടപടിയുമായി പോലീസ് (Thrikkunnapuzha NewsThrikkunnapuzha News). വധശ്രമം ഉൾപ്പെടെയുള്ള വകുപ്പുകൾ ചുമത്തി കണ്ടാലറിയാവുന്ന ആറുപേർ ഉൾപ്പെടെ പത്തുപേർക്കെതിരെ കേസെടുത്തു. കാപ്പ പ്രതി പ്രവീൺ പ്രസന്നൻ, മണ്ണാറശാല മഹേഷ് എന്നിവരുടെ നേതൃത്വത്തിലുള്ള ഗുണ്ടാസംഘങ്ങളാണ് ഏറ്റുമുട്ടിയത്.
സംഭവത്തെക്കുറിച്ച് പോലീസ് പറയുന്നത്:
ബിയർ പാർലറിൽ വെച്ചുണ്ടായ തർക്കമാണ് ക്ഷേത്രോത്സവ നഗരിയിലെ സംഘർഷത്തിൽ കലാശിച്ചത്. ഞായറാഴ്ച പുലർച്ചെയോടെ ഇരുവിഭാഗവും ആയുധങ്ങളുമായി ഏറ്റുമുട്ടുകയായിരുന്നു. അപ്പു ശാസ്താമുറി, ശരത്, അഭിലാഷ്, സജിൻ എന്നിവർക്കും കണ്ടാലറിയാവുന്ന മറ്റ് ആറുപേർക്കുമെതിരെയാണ് തൃക്കുന്നപ്പുഴ പോലീസ് കേസ് രജിസ്റ്റർ ചെയ്തിരിക്കുന്നത്. സംഘർഷത്തിനിടെ ഗുണ്ടാസംഘത്തിൽപ്പെട്ട ഒരാൾ തോക്ക് ചൂണ്ടി ഭീഷണിപ്പെടുത്തിയതായി ദൃക്സാക്ഷികൾ മൊഴി നൽകിയിട്ടുണ്ട്. പത്തോളം പേർക്ക് സംഘർഷത്തിൽ പരിക്കേറ്റു.
വധശ്രമം, കലാപം സൃഷ്ടിക്കൽ, അന്യായമായി കൂട്ടംചേരൽ, മാരകായുധങ്ങൾ കൈവശം വെക്കൽ തുടങ്ങിയ ഗുരുതരമായ വകുപ്പുകളാണ് പ്രതികൾക്കെതിരെ ചുമത്തിയിരിക്കുന്നത്. പ്രതികൾക്കായി പോലീസ് അന്വേഷണം ഊർജിതമാക്കി. ഉത്സവ സീസണുകളിൽ ഗുണ്ടാ വിളയാട്ടം തടയുന്നതിനായി ജില്ലയിൽ സുരക്ഷാ പരിശോധനകൾ കർശനമാക്കുമെന്ന് പോലീസ് അറിയിച്ചു.
Story Summary:
Police booked 10 people following a violent clash between two goon squads during a temple festival in Thrikkunnapuzha, Alappuzha. The groups led by Praveen Prasannan and Mannarassala Mahesh clashed using weapons and even a gun was reportedly brandished.
