ഇന്റർഗ്ലോബ് ഏവിയേഷൻ ലിമിറ്റഡിന്റെ (IndiGo) ചീഫ് എക്സിക്യൂട്ടീവ് ഓഫീസർ പീറ്റർ എൽബേഴ്സ് ഉടൻ പ്രാബല്യത്തോടെ സ്ഥാനമൊഴിഞ്ഞതായി കമ്പനി അറിയിച്ചു (IndiGo CEO Pieter Elbers Resigns). പുതിയ സിഇഒയെ നിശ്ചയിക്കുന്നത് വരെ ഇൻഡിഗോ മാനേജിംഗ് ഡയറക്ടർ രാഹുൽ ഭാട്ടിയ കമ്പനിയുടെ ദൈനംദിന ചുമതലകൾ വഹിക്കും. പീറ്റർ എൽബേഴ്സിന്റെ സേവനങ്ങൾക്ക് ഇൻഡിഗോ ഡയറക്ടർ ബോർഡ് നന്ദി അറിയിച്ചു.
അതേസമയം , അദ്ദേഹത്തിന്റെ പെട്ടെന്നുള്ള സ്ഥാനമൊഴിയൽ വ്യോമയാന മേഖലയിൽ വലിയ ചർച്ചകൾക്ക് വഴിതുറന്നിട്ടുണ്ട്. ഇൻഡിഗോയുടെ സ്ഥാപകനായ രാഹുൽ ഭാട്ടിയ കമ്പനിയുടെ പ്രവർത്തനങ്ങൾ നേരിട്ട് നിയന്ത്രിക്കുന്നത് വഴി കമ്പനിയുടെ സംസ്കാരവും പ്രവർത്തന മികവും കൂടുതൽ ശക്തിപ്പെടുത്താനാണ് ലക്ഷ്യമിടുന്നത്.
ഉപഭോക്താക്കൾക്ക് മികച്ച സേവനവും വിശ്വാസ്യതയും ഉറപ്പാക്കാൻ രാഹുൽ ഭാട്ടിയയുടെ നേതൃത്വം സഹായിക്കുമെന്ന് ബോർഡ് ചെയർമാൻ വിക്രം സിംഗ് മേത്ത പറഞ്ഞു. “22 വർഷം മുൻപ് ഇൻഡിഗോ സ്ഥാപിച്ചത് മുതൽ കമ്പനിയോടും രാജ്യത്തോടും വലിയ ഉത്തരവാദിത്തം തനിക്കുണ്ടെന്നും, ലോകം ബഹുമാനിക്കുന്ന രീതിയിൽ വിമാനക്കമ്പനിയെ മുന്നോട്ട് നയിക്കുമെന്നും” രാഹുൽ ഭാട്ടിയ വ്യക്തമാക്കി.
പുതിയ സിഇഒയെക്കുറിച്ചുള്ള പ്രഖ്യാപനം ഉടൻ ഉണ്ടാകുമെന്നാണ് കമ്പനി നൽകുന്ന സൂചന.
