തിരുവനന്തപുരം: തെക്കൻ കേരളത്തിൽ നിന്നുള്ള വേളാങ്കണ്ണി തീർഥാടകർക്ക് വൻ ആശ്വാസമേകി കെഎസ്ആർടിസിയുടെ (KSRTC Velankanni Bus Service) പുതിയ അന്തർസംസ്ഥാന ബസ് സർവീസ് ഈ വരുന്ന വെള്ളിയാഴ്ച മുതൽ ആരംഭിക്കും. പ്രശസ്ത തീർഥാടന കേന്ദ്രമായ തമിഴ്നാട്ടിലെ വേളാങ്കണ്ണിയിലേക്ക് തിരുവനന്തപുരത്ത് നിന്നും അതീവ കുറഞ്ഞ നിരക്കിൽ സുരക്ഷിത യാത്രാ സൗകര്യം ഒരുക്കിയാണ് കെഎസ്ആർടിസി തങ്ങളുടെ പുതിയ സൂപ്പർ ഫാസ്റ്റ് (Super Fast) സർവീസിന് തുടക്കം കുറിക്കുന്നത്. നിലവിൽ സ്വകാര്യ ലക്ഷ്വറി ബസുകൾ ഈ റൂട്ടിൽ സീസൺ അനുസരിച്ച് 800 രൂപ മുതൽ 2499 രൂപ വരെ യാത്രാക്കൂലി ഈടാക്കുമ്പോൾ, വെറും 538 രൂപ മാത്രമാണ് കെഎസ്ആർടിസി ഈ റൂട്ടിൽ നിശ്ചയിച്ചിട്ടുള്ള ടിക്കറ്റ് നിരക്ക്.
വെള്ളി, ശനി ദിവസങ്ങളിൽ വൈകുന്നേരം 04:30-ന് തിരുവനന്തപുരം സെൻട്രൽ ബസ് സ്റ്റേഷനിൽ നിന്നും പുറപ്പെടുന്ന ഈ സർവീസിന്റെ പൂർണ്ണമായ പ്രവർത്തന ചുമതല കെഎസ്ആർടിസി നെയ്യാറ്റിൻകര ഡിപ്പോയ്ക്കാണ് നൽകിയിട്ടുള്ളത്. വേളാങ്കണ്ണിയിൽ നിന്നും തിരികെ ശനി, ഞായർ ദിവസങ്ങളിൽ വൈകിട്ട് 03:00 മണിക്ക് കേരളത്തിലേക്ക് പുറപ്പെടുന്ന രീതിയിലാണ് സമയക്രമം വിഭാവനം ചെയ്തിരിക്കുന്നത്. തിരുവനന്തപുരം, പാപ്പനംകോട്, നെയ്യാറ്റിൻകര, പാറശാല, കളിയിക്കാവിള, നാഗർകോവിൽ, തിരുനെൽവേലി, മധുര, തിരുച്ചിറപ്പള്ളി, തഞ്ചാവൂർ എന്നീ പ്രധാന നഗരങ്ങൾ വഴിയാണ് ഈ സൂപ്പർ ഫാസ്റ്റ് ബസ് സർവീസ് വേളാങ്കണ്ണിയിൽ എത്തിച്ചേരുക.
നിലവിൽ സ്വകാര്യ ബസ് മാഫിയകൾ മാത്രം കുത്തകയാക്കി വെച്ച് വലിയ തുക ഈടാക്കിയിരുന്ന ഈ റൂട്ടിലേക്ക് ആനവണ്ടി എത്തുന്നതോടെ സാധാരണക്കാരായ തീർഥാടകർക്ക് ഇത് സാമ്പത്തികമായി വലിയ പ്രയോജനകരമാകുമെന്നാണ് കെഎസ്ആർടിസി അധികൃതരുടെ വിലയിരുത്തൽ. നിലവിൽ തെക്കൻ കേരളത്തിൽ കോട്ടയം ജില്ലയിലെ ചങ്ങനാശേരിയിൽ നിന്ന് മാത്രമാണ് കെഎസ്ആർടിസി വേളാങ്കണ്ണിയിലേക്ക് സർവീസ് നടത്തുന്നത്. ചങ്ങനാശേരിയിൽ നിന്നും സൂപ്പർ ഡീലക്സ് ബസാണ് ഈ റൂട്ടിൽ ഓടുന്നത്, 890 രൂപയാണ് അവിടുത്തെ ടിക്കറ്റ് നിരക്ക്. എന്നാൽ തലസ്ഥാനത്തുനിന്നുള്ള പുതിയ സർവീസ് സൂപ്പർ ഫാസ്റ്റ് ആയതിനാലാണ് നിരക്ക് 538 രൂപയായി കുറഞ്ഞത്. പുതിയ സർവീസിനായുള്ള ഓൺലൈൻ സീറ്റ് ബുക്കിങ് കെഎസ്ആർടിസിയുടെ ഔദ്യോഗിക വെബ്സൈറ്റ് വഴിയും മൊബൈൽ ആപ്പ് വഴിയും ഇതിനോടകം ആരംഭിച്ചിട്ടുണ്ട്.
Story Summary:
KSRTC is launching a new international Super Fast bus service from Thiruvananthapuram to Velankanni starting this Friday at a budget-friendly fare of ₹538, significantly cheaper than private operators charging up to ₹2499. Operated by the Neyyattinkara depot, the bus will run on Fridays and Saturdays via Nagercoil, Madurai, and Thanjavur, with return trips on Saturdays and Sundays.
