കൊച്ചി: സംസ്ഥാനത്ത് ലഹരിമാഫിയക്കെതിരെ പോലീസ് നടത്തുന്ന ‘ഓപ്പറേഷൻ തൂഫാൻ’ (Operation Toofan) ശക്തമായി തുടരുന്നതിനിടെ പെരുമ്പാവൂരിൽ വൻ കഞ്ചാവ് വേട്ട (Perumbavoor ganja seizure). ഒഡീഷയിൽ നിന്നും കടത്തിക്കൊണ്ടുവന്ന 34 കിലോ കഞ്ചാവുമായി നാല് ഇതരസംസ്ഥാന തൊഴിലാളികളെ പോലീസ് അറസ്റ്റ് ചെയ്തു. പശ്ചിമ ബംഗാൾ മൂർഷിദാബാദ് സ്വദേശികളായ റക്കീബുൽ ഷേക്ക് (30), ഹസിബൽ ഷേക്ക് (30), സമ്രാട്ട് ഷേക്ക് (36), സഞ്ജീബ് മണ്ഡൽ (48) എന്നിവരെയാണ് പെരുമ്പാവൂർ എഎസ്പിയുടെ നേതൃത്വത്തിലുള്ള പ്രത്യേക അന്വേഷണ സംഘം ശനിയാഴ്ച രാത്രി പിടികൂടിയത്. എറണാകുളം റൂറൽ ജില്ലാ പോലീസ് മേധാവി കെ.എസ്. സുദർശന് ലഭിച്ച കൃത്യമായ രഹസ്യ വിവരത്തെ തുടർന്നായിരുന്നു മിന്നൽ പരിശോധന.
ഒഡീഷയിൽ നിന്ന് ട്രെയിൻ മാർഗം ആലുവയിൽ എത്തിച്ച കഞ്ചാവ്, പോലീസിന്റെ കണ്ണ് വെട്ടിക്കാനായി രണ്ട് ഓട്ടോറിക്ഷകളിലായി പെരുമ്പാവൂരിലേക്ക് കടത്തുന്നതിനിടെയാണ് പ്രതികൾ വലയിലായത്. ഒരുമിച്ച് യാത്ര ചെയ്താൽ പോലീസ് പെട്ടെന്ന് പിടികൂടുമെന്നതിനാലാണ് രണ്ട് ഗ്രൂപ്പുകളായി തിരിഞ്ഞ് ഓട്ടോറിക്ഷകളിൽ സഞ്ചരിച്ചതെന്ന് പ്രതികൾ പോലീസിനോട് സമ്മതിച്ചു. ഒഡീഷയിലെ ലഹരിസങ്കേതങ്ങളിൽ നിന്ന് കിലോയ്ക്ക് വെറും 5,000 രൂപ നിരക്കിൽ വാങ്ങുന്ന ഗുണനിലവാരമുള്ള കഞ്ചാവ്, കേരളത്തിലെത്തിച്ച് കിലോയ്ക്ക് 30,000 രൂപയ്ക്കാണ് ഇവർ വിറ്റിരുന്നത്. ഇവിടെയെത്തി ലഹരിമരുന്ന് കൈമാറി അന്ന് തന്നെ തിരികെ ബംഗാളിലേക്ക് മടങ്ങുന്നതായിരുന്നു ഇവരുടെ പതിവ് രീതി. പ്രതികളിൽ നിന്ന് ലഹരിമരുന്ന് വാങ്ങുന്ന പ്രാദേശിക ഇടപാടുകാരെയും വിതരണക്കാരെയും കുറിച്ച് പോലീസ് അന്വേഷണം ഊർജ്ജിതമാക്കിയിട്ടുണ്ട്.
പെരുമ്പാവൂർ എഎസ്പി ഹാർദിക് മീണ, ഇൻസ്പെക്ടർ എൽ. അനിൽകുമാർ, എസ്ഐമാരായ ജോജോ ജോർജ്, വിഷ്ണു മുരളി, എഎസ്ഐമാരായ പി.എ. അബ്ദുൽ മനാഫ്, പ്രദീപ് കുമാർ, ജയന്തി, സീനിയർ സിപിഒമാരായ അഫ്സൽ, ബെന്നി ഐസക്ക്, നിഷാദ്, റോബിൻ ജോയി, സിപിഒമാരായ സിബിൻ സണ്ണി, നജ്മി, അരുൺ, ബെച്ചു എന്നിവരടങ്ങിയ പ്രത്യേക സംഘമാണ് പ്രതികളെ വലയിലാക്കിയത്. ഇവരെ കോടതിയിൽ ഹാജരാക്കി റിമാൻഡ് ചെയ്യും.
Story Summary: Under the state-wide anti-drug drive ‘Operation Toofan’, a special police team led by Perumbavoor ASP Hardik Meena seized 34 kg of cannabis and arrested four West Bengal natives at Kunnuvazhi. The suspects brought the contraband from Odisha via train to Aluva and were smuggling it to Perumbavoor in two separate auto-rickshaws to evade police detection.
