തൃശൂർ: എൽ.ഡി.എഫ് സർക്കാരിലെ മന്ത്രി ഒ.ജെ. ജനീഷിന് സ്വന്തം വീട്ടിൽ വിരുന്നൊരുക്കിയതിന്റെ പേരിൽ മുതിർന്ന പ്രാദേശിക നേതാവിനെ സിപിഐ പാർട്ടിയിൽ നിന്ന് പുറത്താക്കി (CPI expels leader Thrissur). തൃശൂർ സ്വദേശിയും വർഷങ്ങളായി പാർട്ടിയുടെ സജീവ പ്രവർത്തകനുമായ പി.എസ്. അബ്ദുൾ റഹ്മാനെതിരെയാണ് പാർട്ടി കടുത്ത അച്ചടക്ക നടപടി സ്വീകരിച്ചത്. സിപിഐ അഷ്ടമിച്ചിറ ബ്രാഞ്ച് കമ്മിറ്റിയുടേതാണ് ഈ വിവാദ തീരുമാനം. വർഷങ്ങളായി പാർട്ടിയുടെ വിവിധ ഘടകങ്ങളിൽ നിർണ്ണായക പദവികൾ വഹിച്ചിട്ടുള്ള അബ്ദുൾ റഹ്മാൻ നേരത്തെ ലോക്കൽ കമ്മിറ്റി അംഗമായിരുന്നു. നിലവിൽ ബ്രാഞ്ച് കമ്മിറ്റിയിൽ അംഗമായി പ്രവർത്തിച്ചു വരികയായിരുന്നു.
മന്ത്രി ഒ.ജെ. ജനീഷിന്റെ മണ്ഡലത്തിലെ നന്ദി പ്രകടന സന്ദർശനത്തിനിടയിൽ അബ്ദുൾ റഹ്മാന്റെ വീട്ടിലെത്തുകയും അവിടെവെച്ച് മന്ത്രിക്ക് വിഭവസമൃദ്ധമായ ഭക്ഷണം നൽകി സ്വീകരിക്കുകയും ചെയ്തിരുന്നു. ഇതിന് പിന്നാലെയാണ് പാർട്ടി വിരുദ്ധ പ്രവർത്തനം ആരോപിച്ച് ഇദ്ദേഹത്തെ പുറത്താക്കിയത്. എന്നാൽ, തന്റെ നാട്ടുകാരൻ കൂടിയായ മന്ത്രിക്ക് സ്വന്തം വീട്ടിൽ വെച്ച് ഭക്ഷണം നൽകിയതിൽ ഒരു തെറ്റും കാണുന്നില്ലെന്ന് അബ്ദുൾ റഹ്മാൻ മാധ്യമങ്ങളോട് പ്രതികരിച്ചു.
ഇതിന് പിന്നിൽ യാതൊരുവിധ രാഷ്ട്രീയ ലക്ഷ്യങ്ങളുമില്ലെന്നും, അമ്പത് വർഷത്തിലധികമായി സിപിഐയുടെ വിശ്വസ്തനായ പ്രവർത്തകനായി ജീവിച്ച തനിക്കെതിരെയുള്ള ഈ തീരുമാനം ഏറെ അപ്രതീക്ഷിതവും വേദനാജനകവുമാണെന്ന് അദ്ദേഹം കൂട്ടിച്ചേർത്തു.
അതേസമയം, അബ്ദുൾ റഹ്മാന്റെ ഭാഗത്തുനിന്നുണ്ടായത് തികച്ചും ഗുരുതരമായ പാർട്ടി വിരുദ്ധ പ്രവർത്തനമാണെന്നാണ് സിപിഐ നേതൃത്വത്തിന്റെ വിലയിരുത്തൽ. ഈ പ്രവൃത്തിയിലൂടെ പാർട്ടിക്ക് പ്രാദേശികമായി ഉണ്ടായ അപമാനവും രാഷ്ട്രീയ കോട്ടവും വളരെ വലുതാണെന്ന് ചൂണ്ടിക്കാണിച്ചാണ് ഇദ്ദേഹത്തെ പ്രാഥമിക അംഗത്വത്തിൽ നിന്ന് പുറത്താക്കാൻ അഷ്ടമിച്ചിറ ബ്രാഞ്ച് കമ്മിറ്റി തീരുമാനിച്ചത്. ഈ നടപടി തൃശൂരിലെ സിപിഐ രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിവെച്ചിട്ടുണ്ട്.
Story Summary: The CPI Ashtamichira branch committee in Thrissur has expelled senior local leader P.S. Abdul Rahman for hosting a dinner for Minister O.J. Janeesh at his residence. Rahman, a party member for over 50 years, termed the decision painful and non-political.
