ടെഹ്റാൻ: സംഘർഷം പുകയുന്ന ഹോർമുസ് കടലിടുക്കിൽ കപ്പൽ കമ്പനികളെ വലയിലാക്കി അന്താരാഷ്ട്ര സൈബർ തട്ടിപ്പ് സംഘങ്ങൾ സജീവം (Hormuz Strait scam). ഇറാൻ ഉദ്യോഗസ്ഥരെന്ന വ്യാജേന കപ്പലുകൾക്ക് സുരക്ഷിത പാത വാഗ്ദാനം ചെയ്ത് ലക്ഷക്കണക്കിന് രൂപയുടെ ക്രിപ്റ്റോ കറൻസികളാണ് ഇവർ തട്ടിയെടുക്കുന്നത്. പ്രമുഖ മാരിടൈം റിസ്ക് മാനേജ്മെന്റ് കമ്പനിയായ ‘മാരിസ്ക്സ്’ (Marisxs) ആണ് ഇതുസംബന്ധിച്ച മുന്നറിയിപ്പ് നൽകിയത്.
മേഖലയിലെ യുദ്ധസമാനമായ സാഹചര്യം കാരണം യാത്ര തടസ്സപ്പെട്ട കപ്പലുകളെയാണ് തട്ടിപ്പുകാർ പ്രധാനമായും നോട്ടമിടുന്നത്. ഇറാന്റെ ഔദ്യോഗിക ഭരണകൂടത്തിന്റെ പേരിൽ കപ്പൽ കമ്പനികളെ ബന്ധപ്പെടുന്ന സംഘം, കടലിടുക്ക് കടക്കാനുള്ള പ്രത്യേക അനുമതിക്കായി ‘ട്രാൻസിറ്റ് ഫീ’ ആവശ്യപ്പെടും. ബാങ്ക് ഇടപാടുകൾക്ക് പകരം ബിറ്റ്കോയിൻ, യുഎസ്ഡിടി (USDT) തുടങ്ങിയ ക്രിപ്റ്റോ കറൻസികളായി തുക നൽകണമെന്നാണ് ഇവരുടെ ആവശ്യം.
ഔദ്യോഗിക ഉദ്യോഗസ്ഥരുടേതിന് സമാനമായ ഭാഷാശൈലിയും ഇമെയിൽ മാതൃകകളും ഉപയോഗിക്കുന്നത് കൊണ്ട് തന്നെ പല പ്രമുഖ കമ്പനികളും ഈ ചതിക്കുഴിയിൽ വീഴുന്നുണ്ട്. ഇൻഷുറൻസ് പ്രീമിയവും ഇന്ധനച്ചെലവും വർദ്ധിച്ചതിനിടെ ഇത്തരം സൈബർ കൊള്ളകൾ കൂടി വരുന്നത് ആഗോള കപ്പൽ ഗതാഗത മേഖലയെ കടുത്ത പ്രതിസന്ധിയിലാക്കിയിരിക്കുകയാണ്. അപരിചിതമായ സന്ദേശങ്ങളോട് പ്രതികരിക്കരുതെന്നും ഔദ്യോഗിക ചാനലുകൾ വഴി മാത്രം ആശയവിനിമയം നടത്തണമെന്നും മാരിസ്ക്സ് നിർദ്ദേശിച്ചു.
Summary: Fraudsters posing as Iranian officials are targeting shipping companies in the Hormuz Strait, promising safe passage in exchange for cryptocurrency payments. Maritime risk firm ‘Marisxs’ warned that these sophisticated cyber-scams are exploiting regional tensions to defraud crisis-hit shipping firms.
