Follow on Google News
കൊച്ചി: രാജ്യത്തെ ആഡംബര കാർ വിപണിയിൽ ആധിപത്യം തുടർന്ന് മെഴ്സിഡസ് ബെൻസ്. കഴിഞ്ഞ സാമ്പത്തിക വർഷത്തിൽ (2025-26) റെക്കോർഡ് വിൽപനയാണ് കമ്പനി കൈവരിച്ചത് (Mercedes-Benz India Sales 2026). ആകെ 19,363 കാറുകളാണ് ഇക്കാലയളവിൽ നിരത്തിലിറക്കിയത്. മുൻ വർഷമിത് 18,928 ആയിരുന്നു.
2026 ജനുവരി മുതൽ മാർച്ച് വരെയുള്ള കാലയളവിൽ മാത്രം 5,131 കാറുകൾ വിൽക്കാൻ മെഴ്സിഡസ് ബെൻസിനായി. മുൻ വർഷത്തെ ഇതേ കാലയളവിനേക്കാൾ 7 ശതമാനം വർധനവാണിത്. എസ് ക്ലാസ് (S-Class), മെയ്ബാക്ക് (Maybach), ഇക്യുഎസ് എസ്യുവി (EQS SUV), എഎംജി (AMG) മോഡലുകൾ ഉൾപ്പെടുന്ന ടോപ് എൻഡ് ആഡംബര കാറുകളുടെ വിപണിയിൽ 16 ശതമാനം വളർച്ച രേഖപ്പെടുത്തി.
കമ്പനിയുടെ ആകെ വിൽപനയിൽ 20 ശതമാനവും ഇലക്ട്രിക് വാഹനങ്ങളാണ് (EV). 1.4 കോടി രൂപയ്ക്ക് മുകളിലുള്ള ആഡംബര ഇലക്ട്രിക് കാറുകളുടെ വിപണിയിൽ 85 ശതമാനം വളർച്ച നേടാനായി എന്നത് ശ്രദ്ധേയമാണ്. ഇന്ത്യയിൽ ഏറ്റവും കൂടുതൽ വിൽക്കപ്പെടുന്ന ആഡംബര സെഡാനായി മെഴ്സിഡസ് ബെൻസ് ഇ ക്ലാസ് ലോംഗ് വീൽ ബേസ് (E-Class LWB) സ്ഥാനം നിലനിർത്തി. പുതുതായി അവതരിപ്പിച്ച വി ക്ലാസിനും (V-Class), വരാനിരിക്കുന്ന ഇലക്ട്രിക് സിഎൽഎ (CLA) മോഡലിനും മികച്ച ബുക്കിംഗ് ലഭിക്കുന്നുണ്ട്.
എഎംജി എ45 എസ് 4മാറ്റിക് എയ്റോ ട്രാക്ക് എഡിഷൻ, എഎംജി ജിഎൽഇ 53 4മാറ്റിക് പെർഫോമെൻസ് എഡിഷൻ എന്നിവയും കമ്പനി വിപണിയിലെത്തിച്ചു.
നടപ്പു സാമ്പത്തിക വർഷത്തിൽ വിപുലമായ വികസന പ്രവർത്തനങ്ങളാണ് മെഴ്സിഡസ് ലക്ഷ്യമിടുന്നത്. ഫ്രാഞ്ചൈസി പങ്കാളികളിൽ നിന്നുള്ള 450 കോടി രൂപയിലേറെ നിക്ഷേപം ഉപയോഗിച്ച് ഇന്ത്യയൊട്ടാകെ 20 പുതിയ ആഡംബര വിൽപന കേന്ദ്രങ്ങൾ ആരംഭിക്കാൻ പദ്ധതിയുണ്ട്. ഉപഭോക്താക്കൾക്ക് കൂടുതൽ മികച്ച സേവനം ലഭ്യമാക്കാൻ ഈ വിപുലീകരണം സഹായിക്കുമെന്ന് കമ്പനി പ്രതീക്ഷിക്കുന്നു.
Story Summary:
Mercedes-Benz India reported its highest-ever annual sales of 19,363 units for the last financial year. The company witnessed 7% growth in the Q1 2026 period alone, with 5,131 units sold. Electric Vehicles (EVs) accounted for 20% of the total sales, with the EQS SUV leading the luxury EV segment. Mercedes-Benz also announced an investment of over ₹450 crore through its franchise partners to open 20 new luxury touchpoints across India this fiscal year.
