Follow on Google News
ബെംഗളൂരു: നാല് ദിവസം നീണ്ട അനിശ്ചിതത്വങ്ങൾക്കും തിരച്ചിലിനുമൊടുവിൽ കണ്ണീരോർമ്മയായി മലയാളി പെൺകുട്ടി ശ്രീനന്ദ (Sreenanda Chikmagalur Death News). കർണാടകയിലെ ചിക്കമംഗളൂരു ബാവാ പുത്തൻഗിരി മലനിരകളിൽ വിനോദയാത്രയ്ക്കിടെ കാണാതായ പാലക്കാട് സ്വദേശി രമേശന്റെ മകൾ ശ്രീനന്ദയുടെ (15) മൃതദേഹം കണ്ടെത്തി. വെള്ളിയാഴ്ച ഉച്ചയോടെയാണ് മലയിടുക്കിൽ നിന്ന് മൃതദേഹം കണ്ടെടുത്തത്.
ചൊവ്വാഴ്ച വൈകിട്ട് 5:30-ഓടെയാണ് ബാവാ പുത്തൻഗിരിയിലെ ചെങ്കുത്തായ മലനിരകളിൽ വെച്ച് ശ്രീനന്ദയെ കാണാതാകുന്നത്. കുടുംബത്തോടൊപ്പം ഫോട്ടോ എടുത്ത ശേഷം മിനിറ്റുകൾക്കുള്ളിൽ കുട്ടി അപ്രത്യക്ഷയാവുകയായിരുന്നു. തട്ടിക്കൊണ്ടുപോകൽ അടക്കമുള്ള എല്ലാ സാധ്യതകളും പരിശോധിച്ച് നൂറംഗ പ്രത്യേക ടാസ്ക് ഫോഴ്സും പോലീസും വനംവകുപ്പും സംയുക്തമായി നടത്തിയ വൻ തിരച്ചിലിനൊടുവിലാണ് മൃതദേഹം കണ്ടെത്തിയത്.
ആഴമേറിയ മലയിടുക്കിലാണ് മൃതദേഹം കണ്ടെത്തിയതെന്നാണ് പ്രാഥമിക വിവരം. ചെങ്കുത്തായ ഇറക്കമുള്ള ഈ പ്രദേശത്ത് കുട്ടി കാൽവഴുതി വീണതാകാമെന്നാണ് പോലീസിന്റെ പ്രാഥമിക നിഗമനം. ഡ്രോൺ പരിശോധനയിലാണ് മൃതദേഹം ദൃശ്യമായത്. മൃതദേഹം പുറത്തെടുക്കാനുള്ള നടപടികൾ പോലീസ് വേഗത്തിലാക്കി.
കുട്ടിയെ തട്ടിക്കൊണ്ടുപോയതാകാമെന്നായിരുന്നു മാതാപിതാക്കൾ ആരോപിച്ചിരുന്നത്. ഹമ്പിയിൽ നിന്ന് ആരെങ്കിലും പിന്തുടർന്നിട്ടുണ്ടാകാമെന്നും അവർ സംശയിച്ചിരുന്നു. മൃതദേഹം കണ്ടെത്തിയ സാഹചര്യത്തിൽ, മരണകാരണം സംബന്ധിച്ച് കൂടുതൽ വ്യക്തത വരാൻ പോസ്റ്റ്മോർട്ടം റിപ്പോർട്ട് കാത്തിരിക്കുകയാണ് അന്വേഷണസംഘം.
പാലക്കാട് നിന്നുള്ള 40 അംഗ വിനോദസഞ്ചാര സംഘത്തോടൊപ്പമാണ് ശ്രീനന്ദയും കുടുംബവും ചിക്കമംഗളൂരുവിൽ എത്തിയത്. മൃതദേഹം കണ്ടെത്തിയ വാർത്ത പുറത്തുവന്നതോടെ വലിയ നടുക്കത്തിലാണ് നാടും വിനോദസഞ്ചാര സംഘവും.
Story Summary:
The search for 15-year-old Sreenanda, who went missing during a trip to Chikmagalur, ended in tragedy as her body was discovered in a deep gorge at Bava Puthangiri on Friday. After four days of intensive searching by a 100-member task force and police, the body was spotted during a drone survey. While the family had earlier suspected kidnapping, preliminary reports suggest she might have accidentally fallen down the steep slope. An autopsy is awaited to confirm the cause of death.
