ന്യൂയോർക്ക്: അമേരിക്കയിലെ മിനിയാപൊളിസിൽ സർക്കാർ നടപ്പിലാക്കുന്ന കർശനമായ ഇമിഗ്രേഷൻ നടപടികൾക്കെതിരെയുള്ള പ്രതിഷേധം രക്തച്ചൊരിച്ചിലിൽ കലാശിച്ചു. സുരക്ഷാ സേനയുടെ വെടിയേറ്റ 37 കാരനായ യുഎസ് പൗരൻ കൊല്ലപ്പെട്ടു. സംഭവത്തെത്തുടർന്ന് നഗരത്തിൽ ജനരോഷം ഇരമ്പുകയാണ്. സ്ഥിതിഗതികൾ നിയന്ത്രിക്കാൻ നാഷണൽ ഗാർഡ് സേനയെ വിന്യസിച്ചു.(Security forces killed citizen protesting against immigration measures in the United States)
കുടിയേറ്റ പരിശോധനയ്ക്കെതിരെ പ്രതിഷേധിച്ച യുവാവിനെതിരെയാണ് സുരക്ഷാ ഉദ്യോഗസ്ഥർ വെടിയുതിർത്തത്. വെടിയേറ്റ് ഗുരുതരമായി പരിക്കേറ്റ യുവാവ് ആശുപത്രിയിൽ ചികിത്സയിലിരിക്കെയാണ് മരിച്ചത്. കൊല്ലപ്പെട്ടയാളുടെ പേരുവിവരങ്ങൾ അധികൃതർ ഔദ്യോഗികമായി പുറത്തുവിട്ടിട്ടില്ല.
ഒരു മാസത്തിനിടെ സമാന സാഹചര്യത്തിൽ മിനിയാപൊളിസിൽ കൊല്ലപ്പെടുന്ന രണ്ടാമത്തെ വ്യക്തിയാണിത്. യുവാവിന്റെ കൈവശമുണ്ടായിരുന്ന തോക്ക് പിടിച്ചുവാങ്ങിയ ശേഷം ഉദ്യോഗസ്ഥർ ഇദ്ദേഹത്തിന് നേരെ പലതവണ വെടിവെച്ചതായി സോഷ്യൽ മീഡിയയിൽ പ്രചരിക്കുന്ന ദൃശ്യങ്ങൾ ഉദ്ധരിച്ച് പ്രതിഷേധക്കാർ ആരോപിക്കുന്നു.
സമാധാനപരമായി പ്രതിഷേധിക്കുന്നവർക്കെതിരെ എന്തിനാണ് മാരകായുധങ്ങൾ ഉപയോഗിക്കുന്നത് എന്നാണ് ജനങ്ങളുടെ ചോദ്യം. ആയുധധാരികളായ ഉദ്യോഗസ്ഥരെ നഗരത്തിൽ നിന്ന് അടിയന്തരമായി പിൻവലിക്കണമെന്ന് ആവശ്യപ്പെട്ട് വലിയ തോതിലുള്ള പ്രതിഷേധ പ്രകടനങ്ങളാണ് മിനിയാപൊളിസിൽ നടക്കുന്നത്.
