കൊച്ചി: ലൈംഗിക പീഡനക്കേസിലെ അതിജീവിതമാരുടെ പേര് വെളിപ്പെടുത്തിയതിന് തനിക്കെതിരെ എടുത്ത പോക്സോ (POCSO) കേസ് റദ്ദാക്കണമെന്ന ബിജെപി നേതാവും മുൻ ഡിജിപിയുമായ ആർ. ശ്രീലേഖയുടെ ആവശ്യം ഹൈക്കോടതി അംഗീകരിച്ചില്ല (R Sreelekha POCSO case High Court stay0. കേസിന് ഇടക്കാല സ്റ്റേ നൽകാൻ വിസമ്മതിച്ച ജസ്റ്റിസ് സി. പ്രദീപ് കുമാർ, വിഷയത്തിൽ വിശദീകരണം തേടി സർക്കാരിന് നോട്ടീസ് അയച്ചു.
കിളിരൂർ, കവിയൂർ, പെരുമ്പാവൂർ പീഡനക്കേസുകൾ, നിർഭയ കേസ്, സൗമ്യ വധക്കേസ് തുടങ്ങിയവയിലെ ഇരകളുടെയും അവരുടെ മാതാപിതാക്കളുടെയും വിവരങ്ങൾ ‘സസ്നേഹം ശ്രീലേഖ’ എന്ന തന്റെ യൂട്യൂബ് ചാനലിലൂടെയും ബ്ലോഗിലൂടെയും പരസ്യപ്പെടുത്തിയെന്നാണ് ആരോപണം.
കേസിലെ ഇരകൾ പ്രായപൂർത്തിയായവരാണെന്നും അതിനാൽ പോക്സോ വകുപ്പുകൾ നിലനിൽക്കില്ലെന്നുമാണ് ശ്രീലേഖ കോടതിയിൽ വാദിച്ചത്. കൂടാതെ, മജിസ്ട്രേറ്റ് കോടതി തനിക്ക് പറയാനുള്ളത് കേൾക്കാതെയാണ് എഫ്ഐആർ രജിസ്റ്റർ ചെയ്യാൻ ഉത്തരവിട്ടതെന്നും അവർ ആരോപിച്ചു.
സിവില് റൈറ്റ്സ് ആൻഡ് സോഷ്യൽ ജസ്റ്റിസ് സൊസൈറ്റി സെക്രട്ടറി ആർ. ജയചന്ദ്രൻ നൽകിയ സ്വകാര്യ പരാതിയിലാണ് തിരുവനന്തപുരം മ്യൂസിയം പോലീസ് കേസ് രജിസ്റ്റർ ചെയ്തത്.
തിരഞ്ഞെടുപ്പിലെ പ്രത്യാഘാതം
വട്ടിയൂർക്കാവ് നിയമസഭാ മണ്ഡലത്തിൽ ബിജെപി സ്ഥാനാർത്ഥിയായി മത്സരിക്കാനിരിക്കെയാണ് ശ്രീലേഖയ്ക്ക് കോടതിയിൽ നിന്ന് ഈ തിരിച്ചടിയുണ്ടാകുന്നത്. വട്ടിയൂർക്കാവിൽ തന്റെ സ്ഥാനാർത്ഥിത്വം ഉറപ്പാണെന്നും നാളെ മുതൽ ചുവരെഴുത്ത് പ്രചാരണങ്ങൾ ആരംഭിക്കുമെന്നും ശ്രീലേഖ ഇന്ന് രാവിലെ വ്യക്തമാക്കിയിരുന്നു. കേസ് രാഷ്ട്രീയ പ്രേരിതമാണെന്നും തന്നെ അപകീർത്തിപ്പെടുത്താനുള്ള ശ്രമമാണെന്നുമാണ് ശ്രീലേഖയുടെ നിലപാട്.
കേസ് വീണ്ടും പരിഗണിക്കുന്നതിനായി മാർച്ച് 24-ലേക്ക് കോടതി മാറ്റി. ഹർജി തീർപ്പാക്കുന്നത് വരെ തുട നടപടികൾ നിർത്തിവെക്കണമെന്ന ആവശ്യവും കോടതി അംഗീകരിച്ചിട്ടില്ല.
Story Summary:
The Kerala High Court refused to grant an interim stay on the POCSO case registered against former DGP and BJP leader R. Sreelekha for allegedly revealing the identities of rape survivors through her YouTube channel. Justice C. Pratheep Kumar issued a notice to the government seeking an explanation. Sreelekha contended the case is legally unsustainable as the victims were adults at the time of the incidents. This legal hurdle comes as she prepares to contest from the Vattiyoorkavu constituency as a BJP candidate. The court adjourned the matter to March 24.
