തിരുവനന്തപുരം: വീടിനുള്ളിലെ എയർ കണ്ടീഷണറിൽ (AC) നിന്ന് അഞ്ചോളം പാമ്പുകളെ പിടികൂടി (Snakes inside AC Thiruvananthapuram news). ശ്രീകാര്യം ചെറുവയ്ക്കലിൽ താമസിക്കുന്ന ടെക്നോപാർക്ക് ജീവനക്കാരൻ മാധവ് ജെ. പണിക്കരുടെ വീട്ടിലാണ് നടുക്കുന്ന സംഭവമുണ്ടായത്. ബുധനാഴ്ച രാത്രി ജോലി കഴിഞ്ഞ് മാധവ് വീട്ടിലെത്തിയപ്പോഴാണ് പാമ്പുകളെ ശ്രദ്ധയിൽപ്പെട്ടത്.
കിടപ്പുമുറിയുടെ വാതിൽ തുറന്ന മാധവ്, എസിയുടെ താഴെ ഒരു പാമ്പിന്റെ വാൽ മറയുന്നത് കണ്ട് സംശയിച്ചു. എസിക്ക് സമീപത്ത് നിന്ന് ചെറിയ ശബ്ദങ്ങൾ കേട്ടതോടെ ടോർച്ച് അടിച്ചു നോക്കുകയും പാമ്പുകളെ കണ്ടെത്തുകയുമായിരുന്നു. തുടർന്ന് വനംവകുപ്പിലെ സ്നേക്ക് ക്യാച്ചർ ഗൗതവും എസി ടെക്നീഷ്യനും ചേർന്ന് ഒന്നര മണിക്കൂർ നീണ്ട പരിശ്രമത്തിനൊടുവിലാണ് പാമ്പുകളെ പിടികൂടിയത്.
എസിയുടെ വാട്ടർ പൈപ്പിന് സമീപം ചുമരിലുണ്ടായിരുന്ന ചെറിയ ദ്വാരത്തിലൂടെയാണ് പാമ്പുകൾ എസിക്ക് ഉള്ളിലെത്തിയതെന്നാണ് നിഗമനം. സമീപത്തെ മരച്ചില്ലകൾ വീടിന്റെ ടെറസിലേക്ക് ചാഞ്ഞു കിടന്നത് പാമ്പുകൾക്ക് മുകളിൽ കയറാൻ എളുപ്പമാക്കി.
എസിക്കുള്ളിലുണ്ടായിരുന്ന അഞ്ച് പാമ്പുകളിൽ നാലെണ്ണത്തിനെ പിടികൂടി. ഒരെണ്ണം ഔട്ടർ പൈപ്പിലൂടെ പുറത്തേക്ക് ചാടി രക്ഷപ്പെട്ടു. കൊബേറി അഥവാ വില്ലൂന്നി എന്ന വിഭാഗത്തിൽപ്പെട്ട വിഷമില്ലാത്ത പാമ്പുകളാണിതെന്ന് സ്നേക്ക് ക്യാച്ചർ വ്യക്തമാക്കി. പിടികൂടിയ പാമ്പുകളെ പിന്നീട് ദൂരെയുള്ള സുരക്ഷിതമായ കുറ്റിക്കാട്ടിലേക്ക് തുറന്നുവിട്ടു.
എസി ഉപയോഗിക്കുന്നവർ പൈപ്പുകൾ കടന്നുപോകുന്ന ഭാഗത്തെ ദ്വാരങ്ങൾ കൃത്യമായി അടച്ചിട്ടുണ്ടെന്ന് ഉറപ്പുവരുത്തണമെന്ന് അധികൃതർ നിർദ്ദേശിച്ചു.
Story Summary:
Five snakes were discovered inside an air conditioner at the residence of a Technopark employee in Sreekariyam, Thiruvananthapuram. The incident happened on Wednesday night when the owner, Madhav J Panicker, noticed a snake’s tail near the AC unit. A snake catcher and an AC technician rescued four non-venomous ‘Bronze-back Tree Snakes’ (Villoonni) after a 90-minute operation. One snake managed to escape.
