ലഖ്നൗ: ഉത്തർപ്രദേശിലെ കൃഷ്ണനഗറിൽ 13 വയസ്സുകാരനെ കാറിനുള്ളിൽ വെടിയേറ്റ് മരിച്ച നിലയിൽ കണ്ടെത്തി (Lucknow 13 year old shot dead). സരോജിനി നഗർ സ്വദേശിയായ ഉനൈസ് ഖാൻ ആണ് കൊല്ലപ്പെട്ടത്. സംഭവത്തിൽ ബിജെപി നേതാവും മുൻ എം.എൽ.സിയുമായ അരവിന്ദ് ത്രിപാഠിയുടെ (ഗുഡ്ഡു ത്രിപാഠി) അനന്തരവൻ ഉൾപ്പെടെ നാല് പേർക്കെതിരെ പോലീസ് എഫ്.ഐ.ആർ രജിസ്റ്റർ ചെയ്തു.
റമദാൻ നോമ്പ് എടുത്തിരുന്ന ഉനൈസിനെ തിങ്കളാഴ്ച വൈകുന്നേരമാണ് സുഹൃത്തുക്കൾ എന്ന് പരിചയപ്പെടുത്തിയവർ വീട്ടിൽ നിന്നും വിളിച്ചിറക്കി കൊണ്ടുപോയത്. നോമ്പ് തുറന്ന ശേഷം പോകാമെന്ന് ഉനൈസ് പറഞ്ഞെങ്കിലും പ്രതികൾ നിർബന്ധിച്ച് കാറിൽ കയറ്റി കൊണ്ടുപോവുകയായിരുന്നു എന്ന് പിതാവ് സമീർ ഖാൻ പരാതിയിൽ പറയുന്നു.
തലയ്ക്ക് വെടിയേറ്റ കുട്ടിയെ പ്രതികൾ തന്നെയാണ് ലോക്ബന്ധു ആശുപത്രിയിൽ എത്തിച്ചത്. എന്നാൽ മരണം സ്ഥിരീകരിച്ചതോടെ മൃതദേഹം അവിടെ ഉപേക്ഷിച്ച് പ്രതികൾ കടന്നുകളയുകയായിരുന്നു.
അതേസമയം , കൊലപാതകം ആസൂത്രിതമാണെന്ന് കുടുംബം ആരോപിക്കുന്നു. ഒരു വർഷം മുൻപ് സ്കൂളിൽ വെച്ചുണ്ടായ തർക്കത്തിന്റെ പകയാണ് കൊലപാതകത്തിൽ കലാശിച്ചതെന്ന് ബന്ധുക്കൾ പറയുന്നു. എന്നാൽ, ജന്മദിനാഘോഷത്തിനിടെ സോഷ്യൽ മീഡിയ റീൽസ് ചിത്രീകരിക്കുമ്പോൾ അബദ്ധത്തിൽ വെടിപൊട്ടിയതാണെന്നാണ് ബിജെപി നേതാവിന്റെ കുടുംബം അവകാശപ്പെടുന്നത്.
സംഭവസ്ഥലത്തുനിന്നും ലൈസൻസുള്ള റിവോൾവർ പോലീസ് പിടിച്ചെടുത്തിട്ടുണ്ട്. കേസിൽ വിശദമായ അന്വേഷണം നടക്കുകയാണെന്നും എല്ലാ വശങ്ങളും പരിശോധിക്കുമെന്നും എസിപി രജനീഷ് വർമ്മ അറിയിച്ചു.
Story Summary:
A 13-year-old boy, Unais Khan, was found shot dead inside a car in Lucknow’s Krishna Nagar. The family alleged he was kidnapped and murdered by a group including the nephew of BJP leader Arvind Tripathi. While the family suspects a pre-planned murder due to an old school dispute, the accused claim it was an accidental firing during a social media reels shoot. Police have seized a licensed revolver and started an investigation.
