മസ്കറ്റ്: ഇസ്രായേലും ഇറാനും തമ്മിലുള്ള സംഘർഷം ആഗോള പ്രതിസന്ധിയായി മാറുന്നതിനിടെ സമാധാന ശ്രമങ്ങളുമായി സുൽത്താനേറ്റ് ഓഫ് ഒമാൻ (Oman Mediation Iran Conflict). സംഘർഷം ആരംഭിക്കുന്നതിന് മുൻപ് തന്നെ അമേരിക്കയും ഇറാനും തമ്മിലുള്ള രഹസ്യ ചർച്ചകൾക്ക് വേദിയായിരുന്ന ഒമാൻ, നിലവിലെ സാഹചര്യം തണുപ്പിക്കാൻ ഇറാൻ വിദേശകാര്യ മന്ത്രി അബ്ബാസ് അരാഗ്ചിയുമായി ചർച്ച നടത്തി.
വെടിനിർത്തലിനും ചർച്ചകൾക്കുമുള്ള ഒമാൻ ഭരണകൂടത്തിന്റെ ആഹ്വാനത്തോട് ഇറാൻ അനുകൂലമായി പ്രതികരിച്ചതായി റിപ്പോർട്ടുകൾ സൂചിപ്പിക്കുന്നു. സംഘർഷം ലഘൂകരിക്കാനുള്ള ആത്മാർത്ഥമായ ശ്രമങ്ങളോട് സഹകരിക്കാൻ ഇറാൻ തയ്യാറാണെന്ന് അബ്ബാസ് അരാഗ്ചി അറിയിച്ചതായി ഒമാൻ വിദേശകാര്യ മന്ത്രി ബദർ അൽബുസൈദി വ്യക്തമാക്കി.
അതേസമയം , ചർച്ചകൾക്ക് താൻ തയ്യാറാണെന്ന് അമേരിക്കൻ പ്രസിഡന്റ് ഡൊണാൾഡ് ട്രംപും വ്യക്തമാക്കിയിട്ടുണ്ട്. “അവർ സംസാരിക്കാൻ ആഗ്രഹിക്കുന്നു, ഞാനും അതിന് സമ്മതിച്ചു. ഈ കാര്യങ്ങൾ നേരത്തെ ചെയ്യേണ്ടതായിരുന്നു,” എന്ന് ഫ്ലോറിഡയിലെ വസതിയിൽ വെച്ച് നൽകിയ അഭിമുഖത്തിൽ ട്രംപ് പറഞ്ഞതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. എന്നാൽ ഏത് രാജ്യവുമായാണ് ചർച്ച നടത്തുകയെന്ന് ട്രംപ് വെളിപ്പെടുത്തിയിട്ടില്ല.
പശ്ചിമേഷ്യയിൽ ഇറാനും പാശ്ചാത്യ രാജ്യങ്ങൾക്കും ഇടയിലെ വിശ്വസ്തനായ മധ്യസ്ഥനായാണ് ഒമാൻ അറിയപ്പെടുന്നത്. മുൻപും തടവുകാരുടെ കൈമാറ്റത്തിലും ആണവ കരാറുകളിലും ഒമാൻ നിർണ്ണായക പങ്ക് വഹിച്ചിട്ടുണ്ട്. നിലവിലെ യുദ്ധസാഹചര്യത്തിൽ ഒമാന്റെ ഇടപെടൽ ഒരു വലിയ പ്രാദേശിക യുദ്ധം ഒഴിവാക്കാൻ സഹായിക്കുമെന്നാണ് ലോകരാജ്യങ്ങൾ പ്രതീക്ഷിക്കുന്നത്.
യുദ്ധം വിനാശകരമായ ഘട്ടത്തിലേക്ക് കടക്കുമ്പോൾ, സമാധാന ചർച്ചകൾക്ക് വഴിതുറക്കുന്നത് ഗൾഫ് മേഖലയിലെ പ്രവാസികൾക്കും വലിയ ആശ്വാസമാണ് നൽകുന്നത്.
Story Summary: Oman is actively mediating to de-escalate Middle East tensions between Iran and the US/Israel. Following talks with Oman’s FM Badr Albusaidi, Iranian FM Abbas Araghchi indicated willingness for sincere peace efforts. Meanwhile, US President Donald Trump confirmed his readiness for dialogue from his Florida residence, expressing that practical measures should have been taken earlier.
