ലണ്ടൻ: ലണ്ടനിലെ പ്രശസ്തമായ ബ്രിട്ടീഷ് മ്യൂസിയം തങ്ങളുടെ പ്രദർശനങ്ങളിൽ നിന്ന് ‘പലസ്തീൻ’ എന്ന വാക്ക് നീക്കം ചെയ്തു. ചരിത്രപരമായ പിശകുകൾ തിരുത്തുന്നതിന്റെയും നിഷ്പക്ഷത ഉറപ്പാക്കുന്നതിന്റെയും ഭാഗമായാണ് ഈ നടപടിയെന്ന് മ്യൂസിയം അധികൃതർ വിശദീകരിച്ചു (British Museum Removes Palestine Term Displays). ‘യുകെ ലോയേഴ്സ് ഫോർ ഇസ്രായേൽ’ (UKLFI) എന്ന സംഘടന നൽകിയ പരാതിയെത്തുടർന്നാണ് ഈ മാറ്റം.
പുരാതന കാലം മുതലുള്ള ഭൂപടങ്ങളിലും പ്രദർശനങ്ങളിലും ‘പലസ്തീൻ’ എന്ന പദം ഉപയോഗിക്കുന്നത് ചരിത്രപരമായി ശരിയല്ലെന്നും ഇത് ഇസ്രായേലിന്റെയും യഹൂദ ജനതയുടെയും ചരിത്രത്തെ അവഗണിക്കുന്നതാണെന്നും UKLFI ആരോപിച്ചിരുന്നു. പലസ്തീൻ എന്ന വാക്ക് ബിസി രണ്ടാം സഹസ്രാബ്ദത്തിലെ പ്രദേശങ്ങൾക്ക് അനുയോജ്യമല്ലെന്നും പകരം ‘കാനാൻ’ (Canaan) എന്ന വാക്കാണ് ഉചിതമെന്നുമാണ് മ്യൂസിയത്തിന്റെ നിലപാട്. ആധുനിക ഭൂപടങ്ങളിൽ ഗാസ, വെസ്റ്റ് ബാങ്ക്, ഇസ്രായേൽ തുടങ്ങിയ യുഎൻ പദങ്ങൾ തന്നെ ഉപയോഗിക്കുമെന്നും അധികൃതർ വ്യക്തമാക്കി.
മ്യൂസിയത്തിന്റെ ഈ നടപടിക്കെതിരെ വലിയ പ്രതിഷേധം ഉയർന്നിട്ടുണ്ട്. തീരുമാനത്തിൽ നിന്ന് മ്യൂസിയം പിന്മാറണമെന്ന് ആവശ്യപ്പെട്ട് ആരംഭിച്ച ഓൺലൈൻ ഹർജിയിൽ ഇതിനോടകം 19,000-ത്തിലധികം ആളുകൾ ഒപ്പിട്ടു. ‘ബ്രിട്ടൻ’ എന്ന വാക്കും ആധുനികമായ ഒരു രാഷ്ട്രീയ നിർമ്മിതിയാണെന്നും എന്നാൽ അത് മ്യൂസിയം മാറ്റുന്നില്ലെന്നും പ്രതിഷേധക്കാർ ചൂണ്ടിക്കാട്ടുന്നു. രാഷ്ട്രീയ സമ്മർദ്ദത്തിന് വഴങ്ങിയാണ് ചരിത്രരേഖകളിൽ മാറ്റം വരുത്തുന്നതെന്നാണ് പ്രധാന വിമർശനം. എന്നാൽ മ്യൂസിയത്തിന്റെ നവീകരണ പ്രവർത്തനങ്ങളുടെ ഭാഗമായി കൂടുതൽ മാറ്റങ്ങൾ ഉണ്ടാകുമെന്നാണ് അധികൃതർ നൽകുന്ന സൂചന.
Summary: The British Museum in London has removed the term ‘Palestine’ from several displays, citing historical inaccuracy and a lack of neutrality.
