പല്ലേക്കലെ: കരുത്തരായ ഓസ്ട്രേലിയയെ പുറന്തള്ളി സിംബാബ്വെ ടി20 ലോകകപ്പിന്റെ സൂപ്പർ എട്ട് ഘട്ടത്തിലേക്ക് യോഗ്യത നേടി (Australia Out of T20 World Cup). പല്ലേക്കലെയിൽ നടക്കേണ്ടിയിരുന്ന അയർലൻഡ്-സിംബാബ്വെ മത്സരം കനത്ത മഴയെത്തുടർന്ന് ഉപേക്ഷിച്ചതോടെയാണ് ഓസീസിന്റെ ലോകകപ്പ് സ്വപ്നങ്ങൾ പാതിവഴിയിൽ അവസാനിച്ചത്. ഇതാദ്യമായാണ് ഓസ്ട്രേലിയ ഒരു ടി20 ലോകകപ്പിന്റെ ആദ്യ റൗണ്ടിൽ തന്നെ പുറത്താകുന്നത്.
ഗ്രൂപ്പ് ഘട്ടത്തിൽ ഓസ്ട്രേലിയയെ അട്ടിമറിച്ചതാണ് സിംബാബ്വെയ്ക്ക് തുണയായത്. മത്സരം ഉപേക്ഷിച്ചതോടെ ലഭിച്ച ഒരു പോയിന്റടക്കം ആകെ അഞ്ച് പോയിന്റോടെ സിംബാബ്വെ ഗ്രൂപ്പിൽ രണ്ടാം സ്ഥാനക്കാരായി സൂപ്പർ എട്ടിലെത്തി. ഗ്രൂപ്പ് ബിയിൽ നിന്ന് ശ്രീലങ്ക നേരത്തെ തന്നെ യോഗ്യത ഉറപ്പാക്കിയിരുന്നു. മഴമൂലം മത്സരം മുടങ്ങിയതോടെ അയർലൻഡും ഓസ്ട്രേലിയയ്ക്കൊപ്പം ടൂർണമെന്റിൽ നിന്ന് പുറത്തായി.
വെള്ളിയാഴ്ച ഒമാനെതിരെ നടക്കാനിരിക്കുന്ന മത്സരത്തിൽ ജയിച്ചാലും ഓസ്ട്രേലിയയ്ക്ക് പരമാവധി നാല് പോയിന്റ് മാത്രമേ ലഭിക്കൂ. ഇത് സിംബാബ്വെയെ മറികടക്കാൻ മതിയാകില്ല.
