ന്യൂയോർക്ക്: മൂന്ന് വർഷം പിന്നിട്ട റഷ്യ-യുക്രെയ്ൻ യുദ്ധം അവസാനിപ്പിക്കാനുള്ള നിർണായക നീക്കവുമായി യുക്രെയ്ൻ. യുദ്ധം അവസാനിപ്പിക്കുന്നതിനായി അമേരിക്ക മുന്നോട്ടുവെച്ച സമാധാന കരാർ യുക്രെയ്ൻ അംഗീകരിച്ചു. യുഎസ് അവതരിപ്പിച്ച, 28 കാര്യങ്ങൾ അടങ്ങിയ സമാധാന പദ്ധതിയിൽ ഇരുപക്ഷവും പൊതുധാരണയിലെത്തിയതായി യുക്രെയ്ൻ വ്യക്തമാക്കി.(Ukraine approves US peace plan)
കഴിഞ്ഞയാഴ്ച ജെനീവയിൽ നടന്ന ഉന്നതതല ചർച്ചകൾക്ക് ശേഷമാണ് അമേരിക്കയുടെയും യുക്രെയ്നിന്റെയും ഉദ്യോഗസ്ഥർ സമാധാന കരാറിന് അന്തിമരൂപം നൽകിയത്. ഇരുരാജ്യങ്ങളുടെയും നിർദ്ദേശങ്ങൾ പരിഗണിച്ചാണ് അന്തിമ കരാർ തയ്യാറാക്കിയതെന്ന് യുഎസ് പ്രസിഡന്റ് ഡൊണാൾഡ് ട്രംപ് 'ട്രൂത്ത് സോഷ്യൽ' എന്ന പ്ലാറ്റ്ഫോമിൽ കുറിച്ചു. "ഇതൊരു ഉചിതമായ സമാധാന പദ്ധതിയാണ്. റഷ്യയിലേക്കും യുക്രെയ്നിലേക്കും ഉടൻ പ്രതിനിധികളെ അയക്കും," ട്രംപ് വ്യക്തമാക്കി. കൂടാതെ, ഒമ്പത് മാസത്തിനിടെ താൻ എട്ട് യുദ്ധങ്ങൾ അവസാനിപ്പിച്ചതായും അദ്ദേഹം അവകാശപ്പെട്ടു.
സമാധാന പദ്ധതി അംഗീകരിക്കാൻ ധാരണയായതായി യുക്രെയ്ൻ പ്രസിഡന്റ് വോളോഡിമർ സെലെൻസ്കിയും പ്രതികരിച്ചു. ദിവസങ്ങൾക്കകം അമേരിക്കയിലെത്തി ഡൊണാൾഡ് ട്രംപിനെ നേരിട്ട് കാണുമെന്നും അദ്ദേഹം അറിയിച്ചു. യുക്രെയ്ൻ സമാധാന പദ്ധതി അംഗീകരിച്ചതോടെ, യുദ്ധം അവസാനിപ്പിക്കുന്നതിനുള്ള നിർണായക വഴി തുറന്നിരിക്കുകയാണ്. റഷ്യ കൂടി അനുകൂല നിലപാട് സ്വീകരിച്ചാൽ ഉടൻ യുദ്ധം അവസാനിക്കും. ഇതിനായി വരും ദിവസങ്ങളിൽ ഇരു രാജ്യങ്ങളുമായി നടത്തുന്ന ചർച്ചകൾ നിർണായകമാകും.
സമാധാന കരാർ യുക്രെയ്ൻ അംഗീകരിച്ച സാഹചര്യത്തിൽ റഷ്യയുമായി ചർച്ച നടത്തുമെന്ന് ട്രംപ് അറിയിച്ചു. അദ്ദേഹത്തിന്റെ പ്രതിനിധിയായ സ്റ്റീവ് വിറ്റ്കോഫ് മോസ്കോയിലെത്തി പ്രസിഡന്റ് വ്ളാഡിമിർ പുടിനുമായി സംസാരിക്കും. അതേസമയം, അമേരിക്കൻ സൈനിക സെക്രട്ടറി ഡാൻ ഡ്രിസ്കോൾ യുക്രെയ്ൻ പ്രതിനിധികളുമായി ചർച്ച നടത്തും. ഈ ആഴ്ച കിയവിൽ വെച്ച് യുഎസ് സൈനിക സെക്രട്ടറിയുമായി യുക്രെയ്ൻ പ്രസിഡന്റിന്റെ സൈനിക മേധാവി കൂടിക്കാഴ്ച നടത്തുമെന്നും റിപ്പോർട്ടുകളുണ്ട്.
യുഎസ് ആദ്യമായി സമർപ്പിച്ച സമാധാന കരാറിനോട് റഷ്യക്ക് അനുകൂല നിലപാടായിരുന്നു ഉണ്ടായിരുന്നതെന്നും, അതിൽ മാറ്റം വന്നിട്ടുണ്ടെങ്കിൽ റഷ്യയുടെ തീരുമാനം അനുകൂലമായിരിക്കില്ലെന്നും റഷ്യൻ വിദേശകാര്യ മന്ത്രി സെർജി ലാവ്റോവ് നേരത്തെ മുന്നറിയിപ്പ് നൽകിയിരുന്നു. ട്രംപിൽ നിന്നും കൂടുതൽ സഹകരണം പ്രതീക്ഷിക്കുന്നതായും, റഷ്യ ഏറ്റവും കൂടുതൽ ശ്രദ്ധ നൽകുന്നത് അമേരിക്കൻ ശക്തിക്കാണെന്നുമാണ് സെലെൻസ്കി അഭിപ്രായപ്പെട്ടത്.
എങ്കിലും, യുക്രെയ്നിലെ കിയവിനുള്ള സുരക്ഷാ ഗ്യാരണ്ടികളും യുക്രെയ്ന്റെ കിഴക്കൻ മേഖലകളിലെ സംഘർഷഭരിതമായ പ്രദേശങ്ങളുടെ നിയന്ത്രണവും ഉൾപ്പെടെ റഷ്യയും യുക്രെയ്നും ഇപ്പോഴും കടുത്ത വിയോജിപ്പിലായിരിക്കുന്ന ചില സുപ്രധാന വിഷയങ്ങൾ ഇതുവരെ പരിഹരിക്കപ്പെടാതെ കിടക്കുന്നുണ്ടെന്നാണ് നിലവിലെ റിപ്പോർട്ടുകൾ സൂചിപ്പിക്കുന്നത്. വരാനിരിക്കുന്ന ചർച്ചകളായിരിക്കും ഈ വിഷയങ്ങളിൽ അന്തിമ തീരുമാനമെടുക്കുക.