തായ് പോ : ഹോങ്കോങ്ങിനെ ഞെട്ടിച്ച് തായ് പോയിലെ വാങ് ഫുക് കോർട്ട് എന്ന ബഹുനില റെസിഡൻഷ്യൽ സമുച്ചയത്തിലുണ്ടായ വൻ അഗ്നിബാധയിൽ മരണസംഖ്യ ഉയരുന്നു. ഇതുവരെ 44 പേർ മരിച്ചതായി സ്ഥിരീകരിച്ചു. 279 ഓളം പേരെ കാണാതായിട്ടുണ്ട്.(Massive fire in Hong Kong, Death toll rises to 44)
ഹോങ്കോങ്ങിലെ അഗ്നിബാധ അളവുകളിൽ ഏറ്റവും ഉയർന്ന നിലയായ ലെവൽ 5 തീവ്രത രേഖപ്പെടുത്തിയ ഈ ദുരന്തം ഇന്നലെ ഉച്ചകഴിഞ്ഞാണ് കെട്ടിടസമുച്ചയത്തിൽ പൊട്ടിപ്പുറപ്പെട്ടത്. കെട്ടിടത്തിന്റെ അറ്റകുറ്റപ്പണിക്കായി ചുറ്റും സ്ഥാപിച്ചിരുന്ന മുള കൊണ്ടുള്ള നിർമ്മിതിയാണ് തീ വളരെ വേഗത്തിൽ പല ഭാഗങ്ങളിലേക്ക് പടരാൻ പ്രധാന കാരണം.
സംഭവവുമായി ബന്ധപ്പെട്ട് 52-നും 68-നും ഇടയിൽ പ്രായമുള്ള മൂന്ന് പുരുഷന്മാരെ ഹോങ്കോങ്ങ് പോലീസ് അറസ്റ്റ് ചെയ്തു. തീപിടിത്തം നടന്ന പാർപ്പിട സമുച്ചയത്തിന്റെ അറ്റകുറ്റപ്പണി നടത്തിയിരുന്ന കമ്പനിയുടെ ഉദ്യോഗസ്ഥരാണ് പിടിയിലായതെന്നാണ് റിപ്പോർട്ട്.
ദുരന്തഭൂമിയിലെ രക്ഷാപ്രവർത്തനത്തിനിടെ 37 വയസ്സുള്ള ഒരു അഗ്നിരക്ഷാ സേനാംഗത്തിന് ജീവൻ നഷ്ടപ്പെട്ടു. തീ നിയന്ത്രണ വിധേയമാക്കാനുള്ള തീവ്രശ്രമങ്ങൾക്കിടെയാണ് അദ്ദേഹത്തിന് ദാരുണാന്ത്യം സംഭവിച്ചത്. നിലവിൽ 800-ൽ അധികം അഗ്നിരക്ഷാ പ്രവർത്തകരാണ് രക്ഷാപ്രവർത്തനത്തിൽ ഏർപ്പെട്ടിരിക്കുന്നത്.
എട്ട് ബ്ലോക്കുകളിലായി ഏകദേശം 2000 ഫ്ലാറ്റുകളുള്ള ഒരു വലിയ റെസിഡൻഷ്യൽ കെട്ടിടമാണ് വാങ് ഫുക് കോർട്ട്. 2021-ലെ സെൻസസ് പ്രകാരം 4600 താമസക്കാരും 1984 വീടുകളുമാണ് ഇവിടെ ഉണ്ടായിരുന്നത്. ഹോങ്കോങ്ങിലെ ഏറ്റവും കൂടുതൽ താമസക്കാരുള്ള സമുച്ചയങ്ങളിലൊന്നാണിത്.
രാത്രിയോടെ 7 കെട്ടിടങ്ങളിൽ പ്രകടമായിരുന്ന തീ, തീവ്രമായ ശ്രമങ്ങളിലൂടെ നിലവിൽ 4 കെട്ടിടങ്ങളിലായി കുറയ്ക്കാൻ രക്ഷാപ്രവർത്തകർക്ക് സാധിച്ചിട്ടുണ്ട്. വിവിധ ആശുപത്രികളിലായി 29 പേർ ചികിത്സയിൽ കഴിയുന്നതായി അഗ്നിരക്ഷാ സേനാ അധികൃതർ അറിയിച്ചു. കെട്ടിടത്തിന് ചുറ്റും സ്ഥാപിച്ചിരുന്ന മുള വേലിയും, പോളിസ്റ്റെറീൻ ബോർഡുകൾ ജനാലകളിലെ കാഴ്ച മറച്ചതും തീ നിയന്ത്രണാതീതമായി പടരാൻ കാരണമായെന്നാണ് വിലയിരുത്തൽ.
തീപിടിത്തം ബാധിച്ച കെട്ടിടത്തിലെ താമസക്കാർക്കായി 1400 വീടുകൾ അടിയന്തരമായി സജ്ജമാക്കിയതായി ഹോങ്കോങ്ങ് ഭവന മന്ത്രി അറിയിച്ചു. ഇതിൽ 280 വീടുകൾ തായ് പോയിൽ തന്നെയാണ് ഒരുക്കിയിരിക്കുന്നത്. സുരക്ഷാ ക്രമീകരണങ്ങളുടെ ഭാഗമായി തായ് പോ ജില്ലയിലെ സ്കൂളുകൾക്ക് ഇന്ന് (വ്യാഴാഴ്ച) അവധി നൽകിയിട്ടുണ്ട്. 1983-ൽ നിർമ്മിച്ച ഈ കെട്ടിടത്തിലെ തീ ഇപ്പോഴും പൂർണ്ണമായി അണയ്ക്കാൻ സാധിച്ചിട്ടില്ല. പലയിടത്തുനിന്നും വലിയ തോതിൽ പുക ഉയരുന്നുണ്ട്.