ബീജിംഗ്: സോഷ്യൽ മീഡിയയിൽ ഇപ്പോൾ കാഴ്ചക്കാരെ അമ്പരപ്പിക്കുന്നത് ചൈനയിൽ നിന്നുള്ള ഒരു ദൃശ്യമാണ്. തിരക്കേറിയ തെരുവിലൂടെ മൊബിലിറ്റി സ്കൂട്ടർ ഓടിക്കുന്ന ലാബ്രഡോർ നായയുടെ ദൃശ്യങ്ങളാണ് വൈറലായിരിക്കുന്നത്.
നായയുടെ ഡ്രൈവിംഗ് പ്രാവീണ്യം
വാൻസി എന്ന ലാബ്രഡോർ നായയാണ് ഈ താരം.സിചുവാൻ പ്രവിശ്യയിലെ മെയ്ഷാനിലെ ഒരു തെരുവിലൂടെയാണ് വാൻസി സ്കൂട്ടർ ഓടിച്ചത്. പിൻകാലുകളിൽ നിവർന്നുനിന്ന്, മുൻകാലുകൾ സ്റ്റിയറിംഗ് വീലിൽ വെച്ചാണ് വാൻസി സ്കൂട്ടർ ഓടിക്കുന്നത്. അത്യാവശ്യം തിരക്കുള്ള റോഡിലൂടെ മറ്റ് വാഹനങ്ങൾ കടന്നുപോകുമ്പോഴും വാൻസി വളരെ ശ്രദ്ധയോടെ മുന്നോട്ട് നീങ്ങുന്നത് വീഡിയോയിൽ കാണാം.
ഏകദേശം ഒരു മാസത്തോളമായി വാൻസിയെ ഡ്രൈവിംഗ് പരിശീലിപ്പിക്കുന്നുണ്ടെന്ന് ഉടമ വെളിപ്പെടുത്തി.
മറ്റു പ്രാവീണ്യങ്ങൾ
സ്കൂട്ടർ ഓടിക്കുന്നതിൽ മാത്രമല്ല വാൻസി പ്രാവീണ്യം തെളിയിച്ചിട്ടുള്ളത്. സ്കേറ്റിംഗ് ബോർഡിലും അനായാസം സഞ്ചരിക്കാൻ വാൻസിക്ക് കഴിയും. വീട്ടിലെ ലൈറ്റുകൾ ഓൺ ചെയ്യുക, മാലിന്യം പുറത്തുവയ്ക്കുക തുടങ്ങിയ കാര്യങ്ങളും വാൻസി കൈകാര്യം ചെയ്യും.
നായയുടെ 'ഡ്രൈവിംഗ്' സാധ്യമാക്കാൻ പവർകട്ട് ബ്രേക്ക് ഉൾപ്പെടെയുള്ള മാറ്റങ്ങളോടെയാണ് മൊബിലിറ്റി സ്കൂട്ടർ രൂപപ്പെടുത്തിയെടുത്തത്.
പോലീസ് ഇടപെടൽ
വീഡിയോ വൈറലായതിന് പിന്നാലെ പ്രാദേശിക ട്രാഫിക് പോലീസ് വിഷയത്തിൽ ഇടപെട്ടു. പൊതുനിരത്തുകളിൽ ഒരു നായയെ 'വാഹനം ഓടിക്കാൻ' അനുവദിക്കുന്നത് നിയമപരമല്ലെന്നും ഇത്തരം ഒരു സംഭവം ശ്രദ്ധയിൽപ്പെടുന്നത് ഇതാദ്യമാണെന്നും ട്രാഫിക് മാനേജ്മെൻ്റ് ബ്യൂറോ വ്യക്തമാക്കി.നായയുടെ ഉടമയ്ക്ക് ഇതുമായി ബന്ധപ്പെട്ട് മുന്നറിയിപ്പ് നൽകിക്കഴിഞ്ഞു.റോഡ് സുരക്ഷയെക്കുറിച്ചും ഇത്തരം പ്രകടനങ്ങൾക്ക് നിയന്ത്രണം ഉണ്ടാകേണ്ടതിനെക്കുറിച്ചും ഈ സംഭവം ചോദ്യങ്ങൾ ഉയർത്തുന്നുണ്ട്.