മൊഫിയയുടെ ആത്മഹത്യ: ഭർത്താവും കുടുംബവും കസ്റ്റഡിയിൽ
Nov 24, 2021, 09:45 IST
കൊച്ചി: ആലുവയില് ഭര്തൃപീഡനം മൂലം അഭിഭാഷക വിദ്യാര്ഥിനി മൊഫിയ പര്വീണ് (21) ജീവനൊടുക്കിയ സംഭവത്തിൽ ഭർത്താവും കുടുംബവും കസ്റ്റഡിയിൽ. ഭർത്താവ് മുഹമ്മദ് സുഹൈലും അച്ഛനും അമ്മയുമാണ് കസ്റ്റഡിയിലായത്.കോതമംഗലത്തെ ബന്ധു വീട്ടിൽ ഒളിവിൽ കഴിയുകയായിരുന്ന ഇരുവരെയും ഇന്ന് പുലർച്ചെയാണ് കസ്റ്റഡിയിൽ എടുത്തത്. ആലുവ കീഴ്മാട് എടയപ്പുറം കക്കാട്ടില് പ്യാരിവില്ലയില് മൊഫിയ പര്വീണ് ചൊവ്വാഴ്ച വൈകീട്ട് സ്വന്തം വീട്ടില് തൂങ്ങിമരിച്ചത്. കെ. ദില്ഷാദിന്റെയും ഫാരിസയുടെയും മകളാണ്. ഭര്ത്താവിനെതിരേയും ഭര്ത്തൃവീട്ടുകാര്ക്കെതിരേയും ആലുവ സി.ഐ. സി.എല്. സുധീറിനെതിരേയും ഗുരുതര ആരോപണങ്ങളുമായി മൊഫിയ എഴുതിയ കുറിപ്പും കണ്ടെടുത്തിരുന്നു.ഭർതൃവീട്ടുകാർക്കും സിഐക്കുമെതിരെ നടപടി എടുക്കണമെന്ന് മൊഫിയയുടെ ആത്മഹത്യാക്കുറിപ്പിൽ പറയുന്നു. ഭർത്താവും മാതാപിതാക്കളും ക്രിമിനലുകളാണെന്നും അവർക്ക് പരമാവധി ശിക്ഷ കൊടുക്കണമെന്നും കത്തിൽ ആവശ്യപ്പെടുന്നുണ്ട്. എൽഎൽബി വിദ്യാർഥിനിയാണ് മൊഫിയ.