അടുത്ത മൂന്ന് ദിവസം ശക്തമായ മഴ; ആറ് ജില്ലകളില്‍ യെല്ലോ അലര്‍ട്ട്
Nov 18, 2023, 17:13 IST
തിരുവനന്തപുരം: സംസ്ഥാനത്ത് അടുത്ത മുന്ന് ദിവസം ശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പ്. ശക്തമായ മഴ കണക്കിലെടുത്ത് വിവിധ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. ഇന്ന് കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിലാണ് യെല്ലോ അലര്‍ട്ട് പ്രഖ്യാപിച്ചിരിക്കുന്നത്. ഞായറാഴ്ച കൊല്ലം, പത്തനംതിട്ട, എറണാകുളം, ഇടുക്കി ജില്ലകളിലും തിങ്കളാഴ്ച പത്തനംതിട്ട, കോട്ടയം, ഇടുക്കി ജില്ലകളിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്. 'മിദ്ഹിലി'ചുഴലിക്കാറ്റ് വടക്കു-വടക്കു കിഴക്ക് ദിശയില്‍ സഞ്ചരിച്ചു ഇന്നലെ ബംഗ്ലാദേശ് തീരത്തു ഖേപ്പുപാറയില്‍ പ്രവേശിച്ചു. നിലവില്‍ ചുഴലിക്കാറ്റിന്റെ ശക്തി കുറഞ്ഞു തീവ്രന്യൂനമര്‍ദ്ദമായി ത്രിപുരക്കും മിസോറാമിനും മുകളില്‍ ആയി സ്ഥിതി ചെയ്യുന്നു. അതിനാൽ അടുത്ത 6 മണിക്കൂറില്‍ വടക്കു കിഴക്കു ദിശയില്‍ സഞ്ചരിച്ചു ശക്തി കൂടിയ ന്യൂനമര്‍ദമായി ദുര്‍ബലമാകാന്‍ സാധ്യതയുണ്ട്. ചക്രവാതചുഴി തെക്കു പടിഞ്ഞാറന്‍ ബംഗാള്‍ ഉള്‍ക്കടലില്‍ ശ്രീലങ്കക്ക് മുകളില്‍ സ്ഥിതി ചെയ്യുന്ന സാഹചര്യത്തിലാണ് സംസ്ഥാനത്ത് ശക്തമായ മഴയ്ക്ക് സാധ്യതയെന്ന മുന്നറിയിപ്പ് നൽകിയിരിക്കുന്നത്.