ഇന്നും പുതിയ നിപ്പാ കേസുകളില്ല; കണ്ടെയ്ന്‍മെന്റ് സോണുകളില്‍ ഇളവ് അനുവദിച്ച് സർക്കാർ
കോഴിക്കോട് : സംസ്ഥാനത്ത് ഇന്നും പുതിയ നിപ്പാ കേസുകളില്ലെന്നും ചികത്സയില്‍ കഴിയുന്നവരുടെ ആരോഗ്യനില തൃപ്തികരമാണെന്നും ആരോഗ്യ മന്ത്രി വീണ ജോർജ്. നിലവിലെ സാഹചര്യത്തില്‍ കണ്ടെയ്ന്‍മെന്റ് സോണുകളില്‍ ഇളവുകള്‍ അനുവദിച്ചുവെന്നും മന്ത്രി പറഞ്ഞു. ആദ്യം കണ്ടെയ്ൻമെന്‍റ് സോണുകളായി പ്രഖ്യാപിച്ച ഒമ്പത് പഞ്ചായത്തുകളിലെ 58 വാർഡുകൾക്കാണ് ഇളവുകൾ ലഭിക്കുക. ഈ മേഖലകളിലെ കടകൾ രാത്രി എട്ട് വരെ തുറന്ന് പ്രവർത്തിക്കാമെന്നും ബാങ്കുകൾക്ക് ഉച്ചയ്ക്ക് രണ്ട് വരെ പ്രവർത്തിക്കാമെന്നും ജില്ലാ കളക്ടർ അറിയിച്ചു.
നിപ ജാഗ്രതയുടെ ഭാഗമായി ഏർപ്പെടുത്തിയ മറ്റ് നിയന്ത്രണങ്ങളിൽ ഇളവില്ല. കണ്ടെയ്ൻമെന്‍റ് സോണുകളിൽ ആരാധനാലയങ്ങളിൽ ഉൾപ്പെടെ ഒരു തരത്തിലുള്ള കൂടിച്ചേരലുകൾക്കും പൊതുപരിപാടികൾക്കും അനുമതിയില്ല. സർക്കാർ ഓഫീസ് ജീവനക്കാർ വർക്ക് ഫ്രം ഹോം സംവിധാനത്തിൽ തുടരണം.
ഇതുവരെ 218 സാംപിളുകള്‍ പരിശോധിച്ചു. ഇന്ന് ലഭിച്ച 71 പരിശോധന ഫലങ്ങളും നെഗറ്റീവാണ്. രോഗം ബാധിച്ച് ചികിത്സയിലുള്ള നാലു പേരില്‍ യുവാക്കളായ മൂന്നുപേരുടെയും ആരോഗ്യസ്ഥിതി സ്ഥിരതയോടെ തുടരുന്നു. കുട്ടിക്ക് ഓക്സിജന്‍ നല്‍കുന്നുണ്ട്. ആരോഗ്യ സ്ഥിതി മെച്ചപ്പെടുമെന്നാണ് പ്രതീക്ഷിക്കുന്നതെന്നും മന്ത്രി പറഞ്ഞു.