ന്യൂഡൽഹി: ബംഗ്ലാദേശ് മുഖ്യ ഉപദേഷ്ടാവ് മുഹമ്മദ് യൂനുസ് പാകിസ്ഥാൻ ജോയിന്റ് ചീഫ്സ് ഓഫ് സ്റ്റാഫ് കമ്മിറ്റി ചെയർമാൻ ജനറൽ സാഹിർ ഷംഷാദ് മിർസയ്ക്ക് നൽകിയ 'ആർട്ട് ഓഫ് ട്രയംഫ്' എന്ന കലാസൃഷ്ടിയെ സാധാരണ നയതന്ത്ര സമ്മാനമായി കാണാനാവില്ലെന്ന് ഇന്ത്യൻ ഇന്റലിജൻസ് മുന്നറിയിപ്പ് നൽകി. ഇന്ത്യൻ പ്രദേശങ്ങളെ ഉൾപ്പെടുത്തിയുള്ള ഭൂപടം ഈ കലാസൃഷ്ടിയിൽ ഉൾപ്പെടുത്തിയിട്ടുണ്ട് എന്നതാണ് ആശങ്കയ്ക്ക് കാരണം.(Yunus gifts map to Pak general showing India's Northeast in Bangladesh, stirs row)
ബംഗ്ലാദേശ് ഇടക്കാല സർക്കാരും പാക് സൈനിക നേതൃത്വവും തമ്മിൽ ഒരു രഹസ്യധാരണ നിലനിൽക്കുന്നുവെന്ന സൂചനയിലേക്ക് വിരൽചൂണ്ടുന്ന പല തലങ്ങളിലുള്ള പ്രതീകാത്മക അർത്ഥങ്ങൾ ഈ പ്രവൃത്തിക്കുണ്ടെന്ന് ഇന്റലിജൻസ് വൃത്തങ്ങൾ ആരോപിക്കുന്നു. സാധാരണ നയതന്ത്ര പ്രതിനിധികൾക്കല്ല, മറിച്ച് പാകിസ്താനിലെ ഉന്നത സൈനിക ജനറലിനാണ് യൂനുസ് ഈ സമ്മാനം നൽകിയത്. ഇത് ബോധപൂർവമായ നടപടിയാണെന്നും ബന്ധപ്പെട്ട വൃത്തങ്ങൾ അവകാശപ്പെടുന്നു.
ഇന്ത്യയുടെ വടക്കുകിഴക്കൻ പ്രദേശങ്ങളെ ബംഗ്ലാദേശ് അതിർത്തിക്കുള്ളിൽ ചിത്രീകരിച്ചിരിക്കുന്ന ഭൂപടമാണ് കലാസൃഷ്ടിയിൽ ഉള്ളത്. ഇത് ഇന്ത്യൻ പ്രാദേശിക അഖണ്ഡതയെ ദുർബലപ്പെടുത്താനും 1971-ലെ വിഭജനത്തിന്റെ പഴയ മുറിവുകൾ ഉണർത്താനും ലക്ഷ്യമിട്ടുള്ള ഒരു "സൈക്കോളജിക്കൽ വാർ" ആകാമെന്നാണ് ഇന്റലിജൻസ് മുന്നറിയിപ്പിൽ വ്യക്തമാക്കുന്നത്. പാകിസ്താന്റെ ദീർഘകാലമായുള്ള ഇന്ത്യാ വിരുദ്ധ നിലപാടുകൾക്ക് ബംഗ്ലാദേശ് നിശ്ശബ്ദ പിന്തുണ നൽകുന്നുവെന്ന് ഈ നീക്കം സൂചിപ്പിക്കുന്നുവെന്നും രഹസ്യാന്വേഷണ വൃത്തങ്ങൾ ചൂണ്ടിക്കാട്ടി.
1971-ലെ പാകിസ്താന്റെ സൈനിക പരാജയത്തെ പ്രതീകാത്മകമായി മായ്ച്ചുകളയാനും ഇരു രാജ്യങ്ങളും തമ്മിലുള്ള ഒരു പുതിയ പ്രത്യയശാസ്ത്രപരമായ പങ്കാളിത്തം ഉയർത്തിക്കാട്ടാനുമുള്ള ശ്രമമാണ് ഈ നീക്കമെന്നും വിദഗ്ധർ വിലയിരുത്തുന്നു.
ത്രിപുര, മിസോറാം അതിർത്തികളിലൂടെയുള്ള അനധികൃത നുഴഞ്ഞുകയറ്റത്തിൽ വർദ്ധനവുണ്ടായതായി റിപ്പോർട്ട് ചെയ്യപ്പെട്ട സമയത്താണ് ബംഗ്ലാദേശ് ഈ നീക്കം നടത്തിയതെന്നതും പ്രാധാന്യമർഹിക്കുന്നു. ബംഗ്ലാദേശി ശൃംഖലകളിലൂടെ പ്രവർത്തിക്കുന്ന, പാകിസ്താൻ പിന്തുണയ്ക്കുന്ന എൻ.ജി.ഒ.കൾക്ക് ഈ നുഴഞ്ഞുകയറ്റവുമായി ബന്ധമുണ്ടെന്ന് സുരക്ഷാ ഏജൻസികൾ സംശയിക്കുന്നതായും റിപ്പോർട്ടുണ്ട്.