ന്യൂഡൽഹി: തദ്ദേശീയമായി നിർമിച്ച യുദ്ധവിമാനമായ തേജസ് സുരക്ഷയുടെ കാര്യത്തിൽ ലോകനിലവാരത്തിലുള്ളതാണെന്നും വിമാനത്തിന് യാതൊരു സാങ്കേതിക പ്രശ്നങ്ങളുമില്ലെന്നും എച്ച്.എ.എൽ ചെയർമാനും മാനേജിങ് ഡയറക്ടറുമായ ഡി.കെ. സുനിൽ വ്യക്തമാക്കി.(World class safety, HAL Chairman on Tejas fighter jet)
ദുബായ് എയർഷോയിൽ തേജസ് വിമാനമുണ്ടാക്കിയ അപകടം നിർഭാഗ്യകരമാണ്. എങ്കിലും ഈ സംഭവം വിമാനത്തിന്റെ ഭാവി പദ്ധതികളെ ഒരുതരത്തിലും ബാധിക്കില്ലെന്നും അദ്ദേഹം പറഞ്ഞു. തേജസിന്റെ സുരക്ഷാ റെക്കോർഡ് ലോകത്തിലെ ഏറ്റവും മികച്ചതാണെന്ന് അദ്ദേഹം അവകാശപ്പെട്ടു.
ദുബായ് എയർഷോയിലെ അപകടത്തിൽ വിങ് കമാൻഡർ നമാൻഷ് സ്യാൽ മരിച്ചത് നിർഭാഗ്യകരമാണ്. സംഭവത്തിന് പിന്നിൽ ഗൂഢാലോചനയുണ്ടെന്ന വാദം അദ്ദേഹം പൂർണ്ണമായും തള്ളി. സാമൂഹിക മാധ്യമങ്ങളിൽ 'വിദഗ്ദ്ധരെന്ന്' സ്വയം കരുതുന്ന പലരും പല അഭിപ്രായങ്ങളും പങ്കുവെക്കുന്നുണ്ടെങ്കിലും തേജസിന് സാങ്കേതിക പ്രശ്നങ്ങളില്ല. സായുധസേനയ്ക്ക് എച്ച്.എ.എൽ. നിർമിക്കുന്ന ഉൽപ്പന്നങ്ങളിൽ പൂർണ്ണ ആത്മവിശ്വാസമുണ്ട്. ഒട്ടേറെ പ്രതിരോധ ഉത്പന്നങ്ങൾ നിർമിക്കാൻ സ്ഥാപനത്തിന് ശേഷിയുണ്ടെന്നും അദ്ദേഹം കൂട്ടിച്ചേർത്തു.
എച്ച്.എ.എൽ. നിലവിൽ നിർമ്മിക്കുന്ന മറ്റ് പ്രതിരോധ ഉപകരണങ്ങളുടെ പുരോഗതിയും ഡി.കെ. സുനിൽ വിശദീകരിച്ചു. പരിശീലനവിമാനമായ 'എച്ച്.ടി.ടി.-40' എച്ച്.എ.എൽ. നിർമിക്കുന്നുണ്ട്. രാജ്യത്ത് സർവീസ് നടത്തുന്ന മിക്ക ഹെലിക്കോപ്റ്ററുകളും എച്ച്.എ.എൽ. നിർമിച്ചതാണ്. പൈലറ്റില്ലാത്ത കോംപാറ്റ് ഏരിയൽ വെഹിക്കിളിന്റെ (Combat Aerial Vehicle) നിർമ്മാണം 2026-ൽ പൂർത്തിയാകും. തീരദേശ സേനയ്ക്കുള്ള ഹെലിക്കോപ്റ്റർ: തീരദേശ സേനയ്ക്കായുള്ള ഹെലിക്കോപ്റ്റർ നിർമ്മാണം 2027-ഓടെ പൂർത്തിയാകുമെന്നും അദ്ദേഹം അറിയിച്ചു.