കാമുകി പ്രസവിച്ചു, നാട്ടുകൂട്ടം കല്യാണമുറപ്പിച്ചു; 19 കാരൻ ജീവനൊടുക്കി
Oct 14, 2021, 09:07 IST
ചെന്നൈ: കാമുകിക്ക് പ്രസവിച്ച കുഞ്ഞ് തന്റേതല്ലെന്ന് വാദിച്ചിട്ടും, നാട്ടുകൂട്ടം വിവാഹം ഉറപ്പിച്ചതോടെ 19 കാരൻ ജീവനൊടുക്കി. പുതുക്കോട്ട ജില്ലയിലെ വിരാളിമലയ്ക്കടുത്ത് കീഴ്പൊരുവായ് ഗ്രാമത്തില്‍ താമസിക്കുന്ന എം. രാമരാജാണ് ആത്മഹത്യ ചെയ്തത്. തേഗ്രാമത്തിലെ സമപ്രായക്കാരിയുമായി രാമരാജ് പ്രണയത്തിലായിരുന്നു.ഇതിനിടെ ഗര്‍ഭിണിയായ യുവതി കഴിഞ്ഞയാഴ്ച കുഞ്ഞിന് ജന്മം നല്‍കി. എന്നാല്‍ കുഞ്ഞ് തന്റേതല്ലെന്നും കാമുകിയുടെ ഗര്‍ഭത്തില്‍ തനിക്ക് ബന്ധമില്ലെന്നുമാണ് രാമരാജ് അവകാശപ്പെട്ടിരുന്നത്. പെൺകുട്ടിയെ വിവാഹം കഴിക്കാൻ തയ്യാറല്ലെന്നും പറഞ്ഞിരുന്നു.ഇതേത്തുടര്‍ന്ന് വീട്ടുകാർ ഇടപെട്ട് നാട്ടുകൂട്ടത്തെ സമീപിച്ച് ഇരുവരുടെയും വിവാഹമുറപ്പിക്കുകയായിരുന്നു. ഇരുവീട്ടുകാരും വിവാഹത്തിനുള്ള ഏര്‍പ്പാടുകളുമായി മുന്നോട്ടുപോയി. ഇതേ തുടർന്ന് കഴിഞ്ഞദിവസം രാമരാജ് വീട്ടില്‍ തൂങ്ങിമരിക്കുകയായിരുന്നു. വിവരമറിഞ്ഞെത്തിയ വിരാളിമല പോലീസ് മേല്‍നടപടികള്‍ സ്വീകരിച്ചു. സംഭവത്തില്‍ അന്വേഷണം ആരംഭിച്ചതായും പോലീസ് അറിയിച്ചു.