മുംബൈ: കുവൈത്തിൽ നിന്ന് ഹൈദരാബാദിലേക്ക് പോകുകയായിരുന്ന ഇൻഡിഗോ വിമാനത്തിന് ചാവേർ ഭീഷണി സന്ദേശം ലഭിച്ചതിനെ തുടർന്ന് വിമാനം മുംബൈയിലേക്ക് തിരിച്ചുവിട്ടു. ഹൈദരാബാദ് വിമാനത്താവളത്തിൽ ലഭിച്ച ഒരു ഇമെയിൽ സന്ദേശം വഴിയാണ് ഭീഷണി അധികൃതർക്ക് ലഭിച്ചത്. ഉദ്യോഗസ്ഥർ ഉടൻ തന്നെ സാഹചര്യം വിലയിരുത്തുകയും സുരക്ഷാ സംഘങ്ങളെ സജ്ജരാക്കുകയും ചെയ്തു. വിമാനം സുരക്ഷിതമായി മുംബൈയിൽ ലാൻഡ് ചെയ്തു.(Suicide bomber threat, Kuwait-Hyderabad IndiGo flight diverted to Mumbai)
വിമാനത്തിലെ യാത്രക്കാരുടെ എണ്ണത്തെക്കുറിച്ചോ, സംഭവത്തെക്കുറിച്ചോ ഇൻഡിഗോ എയർലൈൻസിന്റെ ഔദ്യോഗിക പ്രസ്താവനകളൊന്നും ഇതുവരെ പുറത്തുവന്നിട്ടില്ല.
കഴിഞ്ഞ ദിവസം മഹാരാഷ്ട്രയിലെ താനെ ജില്ലയിലെ മീര റോഡ് പ്രദേശത്തെ ഒരു സ്വകാര്യ സ്കൂളിനും ബോംബ് സ്ഫോടന ഭീഷണി ലഭിച്ചിരുന്നു. അടുത്തിടെ രാജ്യത്തെ വിവിധ സ്ഥാപനങ്ങൾക്ക് സമാനമായ ഭീഷണി സന്ദേശങ്ങൾ ലഭിക്കുന്നത് ആശങ്ക സൃഷ്ടിക്കുന്നുണ്ട്.