ബെംഗളൂരു: കർണാടക മുഖ്യമന്ത്രി കസേരയെച്ചൊല്ലിയുള്ള തർക്കങ്ങൾക്കിടെ, മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി.കെ. ശിവകുമാറും കൂടിക്കാഴ്ച നടത്തി. ശനിയാഴ്ച രാവിലെ സിദ്ധരാമയ്യയുടെ വസതിയിൽ ഇരുവരും ഒരുമിച്ചാണ് പ്രഭാതഭക്ഷണം കഴിച്ചത്. പ്രഭാതഭക്ഷണത്തിനുശേഷം മാധ്യമങ്ങളെ കണ്ട ഇരുനേതാക്കളും തങ്ങൾക്കിടയിൽ അഭിപ്രായവ്യത്യാസങ്ങളില്ലെന്ന് ഉറപ്പിച്ചു പറഞ്ഞു.(Siddaramaiah and DK Shivakumar had breakfast together)
"പ്രഭാതഭക്ഷണം നന്നായിരുന്നു. ഞങ്ങൾ അവിടെ മറ്റൊന്നും സംസാരിച്ചില്ല. ഞങ്ങൾ ഭക്ഷണം കഴിക്കുക മാത്രമാണ് ചെയ്തത്. ഡി.കെ.എസ്. ഇന്ന് ഞങ്ങളുടെ വീട്ടിൽ വന്നു, എന്നെ അദ്ദേഹത്തിന്റെ വീട്ടിലേക്ക് ക്ഷണിച്ചു, അത്രയേ ഉണ്ടായുള്ളൂ. ഞങ്ങൾക്കിടയിൽ അഭിപ്രായ വ്യത്യാസങ്ങളില്ല, ഭാവിയിലും ഉണ്ടാകില്ല." - മുഖ്യമന്ത്രി സിദ്ധരാമയ്യ പറഞ്ഞു.
2028-ലെ തിരഞ്ഞെടുപ്പാണ് തങ്ങളുടെ പ്രധാന അജണ്ടയെന്ന് വ്യക്തമാക്കിക്കൊണ്ട് ഡി.കെ. ശിവകുമാർ സംസാരിച്ചു. "2028-ലെ തിരഞ്ഞെടുപ്പാണ് ഞങ്ങളുടെ അജണ്ട. തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് പ്രധാനമാണ്. ഞങ്ങൾ അതിനെക്കുറിച്ച് ചർച്ച ചെയ്തു. 2028-ലെ തിരഞ്ഞെടുപ്പിൽ കോൺഗ്രസിനെ വീണ്ടും അധികാരത്തിൽ എത്തിക്കുന്നതിനെക്കുറിച്ചും സംസാരിച്ചു. ഒരുമിച്ച് മുന്നോട്ട് പോകാൻ തന്നെയാണ് ഞങ്ങളുടെ തീരുമാനം. ഞങ്ങൾക്കിടയിൽ അഭിപ്രായ വ്യത്യാസങ്ങളില്ല, ഭാവിയിലും ഉണ്ടാകില്ല." - ഡി.കെ.എസ്. പറഞ്ഞു.
കർണാടകയിലെ അടിസ്ഥാന വിഭവങ്ങളായ ഉപ്പുമാവും, ഇഡ്ഡലിയും, കേസരി ബാത്തും ആസ്വദിക്കുന്ന ഇരുനേതാക്കളുടെയും ചിത്രം അണികൾ ഏറ്റെടുത്തു കഴിഞ്ഞു. ഈ കൂടിക്കാഴ്ചയെ രാഷ്ട്രീയ നിരീക്ഷകർ കാണുന്നത്, 2026 മാർച്ച്-ഏപ്രിൽ മാസത്തോടെ സിദ്ധരാമയ്യയിൽനിന്ന് ശിവകുമാറിലേക്ക് അധികാരം കൈമാറ്റം നടക്കും എന്നതിന്റെ സൂചനയായാണ്. പ്രഭാതഭക്ഷണത്തിന് പിന്നാലെ ഇരുവരും ഒരുമിച്ചുള്ള ചിത്രം സാമൂഹിക മാധ്യമങ്ങളിൽ പങ്കുവെക്കുകയും ചെയ്തു.
അധികാര കൈമാറ്റം നടക്കുന്നതുവരെ ശിവകുമാർ ഉപമുഖ്യമന്ത്രിയായി തുടരുമെന്ന് കോൺഗ്രസ് വൃത്തങ്ങൾ അറിയിച്ചു. സിദ്ധരാമയ്യയെപ്പോലെയുള്ള ഒരു മുതിർന്ന നേതാവിനെ സ്ഥാനഭ്രഷ്ടനാക്കുന്നത് പാർട്ടിയെ ദോഷകരമായി ബാധിക്കുമെന്ന വിലയിരുത്തലിലാണ് കേന്ദ്ര നേതൃത്വം. ശിവകുമാർ ഇന്ന് വൈകുന്നേരം പാർട്ടിയുടെ കേന്ദ്ര നേതാക്കളെ കാണാൻ ഡൽഹിയിലേക്ക് പോകും. പുനഃസംഘടനയിൽ തന്റെ വിശ്വസ്തർക്ക് കൂടുതൽ മന്ത്രിസ്ഥാനങ്ങൾ ലഭിക്കുന്നത്, സംസ്ഥാന കോൺഗ്രസ് അധ്യക്ഷനായി തുടരുന്നത്, മുഖ്യമന്ത്രിക്കെതിരെ നീക്കത്തിന് അംഗബലം ഇല്ലാത്തത് തുടങ്ങി നിരവധി കാരണങ്ങളാൽ സിദ്ധരാമയ്യയുടെ പിന്തുണയോടെയുള്ള അധികാര കൈമാറ്റത്തിന് ശിവകുമാർ സമ്മതിക്കാൻ സാധ്യതയുണ്ടെന്നും വൃത്തങ്ങൾ പറയുന്നു.