സനാതന ധര്‍മ വിവാദം: ഇന്ത്യാ സഖ്യവും ഡിഎംകെയും ഹിന്ദുക്കള്‍ക്ക് എതിരാണെന്ന് കേന്ദ്ര ധനമന്ത്രി
ന്യൂഡല്‍ഹി: സനാതന ധര്‍മ വിവാദത്തില്‍ പ്രധാനമന്ത്രി നരേന്ദ്ര മോദിയുടെ ആദ്യപ്രതികരണത്തിന് പിന്നാലെ ഇന്ത്യാ സഖ്യത്തിനും ഡിഎംകെയ്ക്കുമെതിരെ ആഞ്ഞടിച്ച് കേന്ദ്ര ധനമന്ത്രി നിര്‍മലാ സീതാരാമന്‍.
പ്രതിപക്ഷ സഖ്യമായ ഇന്ത്യയും ഡിഎംകെയും ഹിന്ദുക്കള്‍ക്കും സനാതന ധര്‍മത്തിനും എതിരാണെന്ന് നിര്‍മലാ സീതാരാമൻ പറഞ്ഞു. ഇന്ത്യയെ തകര്‍ക്കാര്‍ ശ്രമിക്കുന്ന വിഭാഗങ്ങളെയാണ് പ്രതിപക്ഷം പിന്തുണയ്ക്കുന്നതെന്നും സനാതന ധര്‍മത്തെ ഇല്ലാതാക്കാനാണ് ഇവരുടെ ശ്രമമെന്നും കേന്ദ്രമന്ത്രി പറഞ്ഞു.
സനാതന ധര്‍മം ആളുകള്‍ക്കിടയില്‍ വിവേചനം സൃഷ്ടിക്കുമെന്ന ഡിഎംകെ നേതാവ് ഉദയനിധി സ്റ്റാലിന്‍റെ പരാമര്‍ശത്തെ മന്ത്രി വിമര്‍ശിച്ചു. ഡിഎംകെ നടത്തുന്നത് കപടനാട്യമാണെന്നും 70 വര്‍ഷമായി ഇവര്‍ ഇതാണ് ചെയ്യുന്നതെന്നും ധനമന്ത്രി കുറ്റപ്പെടുത്തി.