ശിവഗംഗ: തമിഴ്നാട് സ്റ്റേറ്റ് ട്രാൻസ്പോർട്ട് കോർപ്പറേഷന്റെ രണ്ട് ബസുകൾ കൂട്ടിയിടിച്ച് 11 പേർ മരിക്കുകയും 50 പേർക്ക് പരിക്കേൽക്കുകയും ചെയ്തു. ശിവഗംഗ ജില്ലയിലെ തിരുപ്പത്തൂരിന് സമീപം നാചിയപുരം ഗ്രാമത്തിൽ ഇന്നലെയായിരുന്നു ദാരുണമായ അപകടം.(Major tragedy as 2 government buses collide in Tamil Nadu, 11 people die in tragic accident)
നാചിയപുരത്തെ വിവേകാനന്ദ പോളിടെക്നിക് കോളേജിന് സമീപത്ത് വെച്ചാണ് അപകടം സംഭവിച്ചത്. കാരൈക്കുടിയിൽ നിന്ന് ദേവക്കോട്ടയിലേക്ക് പോയ ബസും, ദേവക്കോട്ടയിൽ നിന്ന് ദിണ്ടിഗലിലേക്ക് പോയ ബസും തമ്മിലാണ് കൂട്ടിയിടിച്ചത്. ഒരു ബസിന്റെ ഡ്രൈവറായ പി. സെന്ദരയ്യൻ സംഭവസ്ഥലത്ത് വെച്ച് തന്നെ മരിച്ചു.
അപകടത്തിൽ പരിക്കേറ്റ അൻപതോളം പേരെ വിവിധ ആശുപത്രികളിൽ പ്രവേശിപ്പിച്ചു. കാരൈക്കുടി ഗവൺമെന്റ് ആശുപത്രി, തിരുപ്പത്തൂർ സർക്കാർ ആശുപത്രി, ശിവഗംഗ ആശുപത്രി എന്നിവിടങ്ങളിലാണ് പരിക്കേറ്റവരെ പ്രവേശിപ്പിച്ചത്. ഇവരിൽ ഗുരുതരാവസ്ഥയിലായ ആറ് പേരെ വിദഗ്ദ്ധ ചികിത്സയ്ക്കായി മധുരൈയിലെ രാജാജി സർക്കാർ ആശുപത്രിയിലേക്ക് മാറ്റി.
മരിച്ച 11 പേരിൽ ഒൻപത് പേർ സ്ത്രീകളും രണ്ട് പേർ പുരുഷന്മാരുമാണ്. ഇവരിൽ ചിലരെ തിരിച്ചറിഞ്ഞിട്ടുണ്ട്. രണ്ട് മൃതദേഹങ്ങൾ ശിവഗംഗ ആശുപത്രിയിലും, ആറ് മൃതദേഹങ്ങൾ തിരുപ്പത്തൂർ ആശുപത്രിയിലും, മൂന്ന് മൃതദേഹങ്ങൾ കാരൈക്കുടി ആശുപത്രിയിലും സൂക്ഷിച്ചിരിക്കുന്നു. അപകടം നേരിൽ കണ്ട നാട്ടുകാരാണ് ആദ്യം രക്ഷാപ്രവർത്തനം നടത്തിയത്.