ന്യൂഡൽഹി: കാനഡയിൽ ഖാലിസ്ഥാൻ രൂപീകരണത്തിനായി നടന്ന അനൗദ്യോഗിക റഫറണ്ടം വലിയ നയതന്ത്ര തർക്കത്തിന് വഴിയൊരുക്കി. സിഖ്സ് ഫോർ ജസ്റ്റിസ് (SFJ) എന്ന നിരോധിത സംഘടനയുടെ നേതൃത്വത്തിൽ നടന്ന റഫറണ്ടത്തിൽ അൻപതിനായിരത്തിലേറെ പേർ പങ്കെടുത്തതായി സംഘടന അവകാശപ്പെട്ടു. വോട്ടെടുപ്പിനെത്തിയ ചിലർ ഇന്ത്യയുടെ ദേശീയ പതാകയെ അപമാനിക്കുകയും ചെയ്തു.(Khalistan referendum, Sikh organization says 50,000 people participated in Canada, India responds)
റഫറണ്ടത്തിനെതിരെ ഇന്ത്യൻ ഹൈക്കമ്മീഷണർ ദിനേശ് പട്നായിക് ശക്തമായി രംഗത്തെത്തി. റഫറണ്ടം വെറുമൊരു പ്രഹസനമാണെന്നും, ഇന്ത്യയുടെ ആഭ്യന്തര വിഷയങ്ങളിലുള്ള കൈകടത്തലായി ഇതിനെ കാണുമെന്നും അദ്ദേഹം വിമർശിച്ചു.
ചാനൽ ചർച്ചയിലാണ് അദ്ദേഹം തൻ്റെ വിമർശനം അറിയിച്ചത്. "ഇത് നിങ്ങൾക്ക് നടത്താൻ കഴിയുന്ന ഒരു പരിഹാസ്യമായ റഫറണ്ടമാണ്. സമാധാനപരമായി പ്രതിഷേധിക്കുന്നതിൽ ഞങ്ങൾക്ക് പ്രശ്നമില്ല. ഖാലിസ്ഥാനി സർക്കാർ രൂപീകരിക്കാൻ ആവശ്യപ്പെടുന്ന രാഷ്ട്രീയ പാർട്ടികൾ ഇന്ത്യയിലുണ്ട്, അവർ പാർലമെൻ്റിലുണ്ട്. എന്നാൽ റഫറണ്ടങ്ങൾക്ക് അതിൻ്റേതായ നടപടിക്രമങ്ങളുണ്ട്. ഇത് കാനഡക്കാർ കാനഡയിൽ നടത്തുന്ന ഒരു റഫറണ്ടമാണ്. നിങ്ങൾക്ക് അത് ചെയ്യണമെങ്കിൽ ചെയ്യൂ."
ഇന്ത്യയുടെ ആഭ്യന്തര കാര്യങ്ങളിൽ കാനഡ ഇടപെടുന്നതിനെ അദ്ദേഹം രൂക്ഷമായി വിമർശിച്ചു. "സമാധാനപരമാണെങ്കിൽ കുഴപ്പമില്ല. പക്ഷേ ഇവിടെ എന്താണ് ചെയ്യുന്നത്? ഇന്ത്യയുടെ മുൻ പ്രധാനമന്ത്രി ഇന്ദിരാഗാന്ധി കൊല്ലപ്പെട്ടതിൻ്റെ ചിത്രങ്ങൾ പ്രദർശിപ്പിക്കുകയാണ്. പഞ്ചാബിലെ മുൻ മുഖ്യമന്ത്രിയെ കൊലപ്പെടുത്തിയ ചാവേർ ബോംബർമാരെ മഹത്വവൽക്കരിക്കുകയാണ്."
"കാനഡയിൽ നിന്ന് വേർപെട്ട് സ്വതന്ത്ര രാജ്യമാകണോ എന്നതിനെക്കുറിച്ച് ക്യൂബെക്ക് 1980-ലും 1995-ലും റഫറണ്ടങ്ങൾ നടത്തി. ക്യൂബെക്കിൽ മറ്റേതെങ്കിലും രാജ്യം ഇതേ കാര്യം ചെയ്യുന്ന സാഹചര്യം സങ്കൽപ്പിക്കുക. നിങ്ങൾക്ക് എന്ത് തോന്നും?" – അദ്ദേഹം ചോദിച്ചു. ചാനൽ അവതാരകൻ ഇത് രണ്ടും ഒരേ കാര്യമല്ലെന്ന് പറഞ്ഞ് ഇടപെട്ടപ്പോൾ, ഇന്ത്യയിൽ ഈ വിഷയം വളരെ സെൻസിറ്റീവ് ആണെന്ന് ഹൈക്കമ്മീഷണർ കൂട്ടിച്ചേർത്തു.
സിഖ്സ് ഫോർ ജസ്റ്റിസ് ഇന്ത്യയിൽ നിരോധിക്കപ്പെട്ട സംഘടനയാണ്. ഗുർപന്ത് സിങ് പന്നുവിൻ്റെ നേതൃത്വത്തിലായിരുന്നു റഫറണ്ടം നടന്നത്. പലരും ഖാലിസ്ഥാൻ പതാകകളുമായാണ് വോട്ടെടുപ്പിന് എത്തിയത്. 2023-ൽ കൊല്ലപ്പെടുന്നതുവരെ ഹർദീപ് സിംഗ് നിജ്ജാർ നേതൃത്വം നൽകിയ സംഘടന കൂടിയാണ് സിഖ്സ് ഫോർ ജസ്റ്റിസ്.