ബെംഗളൂരു : കർണാടകയിലെ അധികാരത്തർക്കവും കോൺഗ്രസിലെ ആഭ്യന്തര പ്രശ്നങ്ങളും രൂക്ഷമായി തുടരുന്നതിനിടെ, പ്രതിസന്ധി പരിഹരിക്കാൻ കോൺഗ്രസ് മുൻ അധ്യക്ഷ സോണിയാ ഗാന്ധി നേരിട്ട് രംഗത്ത്. പ്രശ്നപരിഹാരത്തിനായി ശനിയാഴ്ച മുതിർന്ന കോൺഗ്രസ് നേതാക്കളുമായി സോണിയാ ഗാന്ധി ഡൽഹിയിൽ ചർച്ച നടത്തി.(Karnataka Congress dispute, Sonia Gandhi steps in to resolve crisis)
ഏകദേശം മൂന്ന് മണിക്കൂറോളം നീണ്ട യോഗത്തിൽ കോൺഗ്രസ് അധ്യക്ഷൻ മല്ലികാർജുൻ ഖാർഗെ, പ്രതിപക്ഷ നേതാവ് രാഹുൽ ഗാന്ധി, ജനറൽ സെക്രട്ടറി (സംഘടന) കെ.സി. വേണുഗോപാൽ എന്നിവരും പങ്കെടുത്തു. കർണാടകയിലെ പ്രതിസന്ധി സംബന്ധിച്ച് നേതൃത്വം വീണ്ടും യോഗം ചേരും. ഡിസംബർ 14-നോ 15-നോ ആയിരിക്കും നിർണായകമായ ഈ കൂടിക്കാഴ്ച. ഡിസംബർ 14-ന് ഡൽഹിയിലെ രാംലീല മൈതാനത്ത് നടക്കുന്ന 'വോട്ട് മോഷണ'ത്തിനെതിരായ കോൺഗ്രസ് മെഗാ റാലിക്ക് ശേഷം നേതാക്കൾ യോഗം ചേരുമെന്നാണ് റിപ്പോർട്ടുകൾ സൂചിപ്പിക്കുന്നത്.
അടുത്ത യോഗം നടക്കുന്നതുവരെ നിലവിലെ സർക്കാരിനെ ഒരു തരത്തിലും ബുദ്ധിമുട്ടിക്കരുതെന്ന് മുതിർന്ന നേതാക്കൾ യോഗത്തിൽ തീരുമാനിച്ചു. അടുത്ത കൂടിക്കാഴ്ചയിൽ കർണാടക മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി.കെ. ശിവകുമാർ എന്നിവരുൾപ്പെടെയുള്ള സംസ്ഥാന നേതാക്കളും പങ്കെടുക്കുമെന്ന് പാർട്ടി വൃത്തങ്ങൾ അറിയിച്ചു.
യോഗത്തിന് ശേഷം മാധ്യമപ്രവർത്തകരെ കണ്ട കെ.സി. വേണുഗോപാൽ, കർണാടകയിലെ നിലവിലെ വിഷയം ചർച്ച ചെയ്തതായി സ്ഥിരീകരിച്ചു. "കർണാടക ഉൾപ്പെടെയുള്ള രാജ്യത്തെ പൊതുവായ രാഷ്ട്രീയ സാഹചര്യങ്ങളെക്കുറിച്ച് ഒരു ചർച്ച നടന്നു. കർണാടകയെക്കുറിച്ച് കൂടുതൽ വിശദമായ മറ്റൊരു ചർച്ച വൈകാതെ ഉണ്ടാകും," അദ്ദേഹം പറഞ്ഞു.