ന്യൂഡൽഹി: ചെങ്കോട്ട സ്ഫോടനക്കേസിൽ അറസ്റ്റിലായ ഫരീദാബാദ് ഭീകരസംഘം രാജ്യതലസ്ഥാനത്ത് വൻ ഭീകരാക്രമണങ്ങൾക്ക് പദ്ധതിയിട്ടതായി അന്വേഷണ ഏജൻസികളുടെ റിപ്പോർട്ട്. ചെങ്കോട്ടയും തിരക്കേറിയ കച്ചവട കേന്ദ്രങ്ങളും ആക്രമിക്കാൻ ഇവർ ലക്ഷ്യമിട്ടിരുന്നുവെന്നാണ് പുറത്തുവരുന്ന വിവരം.(Faridabad terror group planned a major terror attack in Delhi)
കഴിഞ്ഞ റിപ്പബ്ലിക് ദിനത്തിൽ ചെങ്കോട്ടയിൽ ആക്രമണം നടത്താനായിരുന്നു ഭീകരസംഘത്തിന്റെ പ്രധാന പദ്ധതികളിലൊന്ന്. ദീപാവലി ദിനത്തിൽ ഡൽഹിയിലെ തിരക്കേറിയ മറ്റ് കേന്ദ്രങ്ങളിലും സ്ഫോടനം നടത്താൻ പദ്ധതിയിട്ടിരുന്നു.
ജനുവരി ആദ്യവാരം തന്നെ ഡോ. മുസമ്മിലും സ്ഫോടനം നടത്തിയ ഉമറും ചെങ്കോട്ട പരിസരത്ത് എത്തി റെക്കി നടത്തിയിരുന്നുവെന്ന് കണ്ടെത്തി. ഫരീദാബാദിൽ അറസ്റ്റിലായ ഡോ. മുസമ്മിലിന്റെ മൊബൈൽ ഫോണിൽ നിന്നാണ് നിർണ്ണായകമായ ഈ വിവരങ്ങൾ അന്വേഷണ ഏജൻസികൾക്ക് ലഭിച്ചത്.
ഡൽഹിയിൽ സ്ഫോടനം നടത്തിയ ഉമർ മുഹമ്മദ് ആണ് അറസ്റ്റിലായ വൈറ്റ് കോളർ ഭീകരസംഘത്തിന്റെ നേതാവെന്നാണ് അന്വേഷണ ഏജൻസികളുടെ കണ്ടെത്തൽ. ഉമർ ഓടിച്ച കാറിൽ 70 കിലോയോളം അമോണിയം നൈട്രേറ്റ് ഉണ്ടായിരുന്നു. സ്ഫോടനം നടത്തിയത് ഡിറ്റിനേറ്ററോ ടൈമറോ ഉപയോഗിച്ചായിരിക്കാം എന്നാണ് സൂചന.
കാറിൽ ഐ.ഇ.ഡി. (Improvised Explosive Device) ഉണ്ടായിരുന്നതിന് ഇതുവരെ വ്യക്തമായ തെളിവ് ലഭിച്ചിട്ടില്ല. വയറുകളോ, ടൈമർ ഉപകരണങ്ങളോ, ഡിറ്റണേറ്ററോ, ബാറ്ററികളോ, ലോഹ ചീളുകളോ സംഭവസ്ഥലത്ത് നിന്ന് കണ്ടെത്താൻ കഴിഞ്ഞിട്ടില്ല.
ഡൽഹി ചെങ്കോട്ട സ്ഫോടന കേസുമായി ബന്ധപ്പെട്ട് അന്വേഷണ ഏജൻസികൾ ശ്രീനഗറിൽ നിന്ന് മറ്റൊരു ഡോക്ടറെക്കൂടി കസ്റ്റഡിയിലെടുത്തു. ഡോക്ടർമാരുൾപ്പെട്ട ഭീകരസംഘത്തിന്റെ പങ്കാളിത്തം കേസിൽ കൂടുതൽ വ്യക്തമാവുകയാണ്. തജാമുൾ അഹമ്മദ് മാലിക് ആണ് കസ്റ്റഡിയിലായ ഡോക്ടർ.
ശ്രീനഗറിലെ എസ്.എച്ച്.എം.എസ്. (S.H.M.S.) ആശുപത്രിയിൽ ഡോക്ടറായി ജോലി ചെയ്യുന്നയാളാണ് ഇദ്ദേഹം.നേരത്തെ, ഫരീദാബാദ്, സഹറൻപുർ എന്നിവിടങ്ങളിൽ നിന്ന് മൂന്ന് ഡോക്ടർമാർ ഉൾപ്പെടെയുള്ളവരെ പോലീസ് അറസ്റ്റ് ചെയ്യുകയും കസ്റ്റഡിയിൽ എടുക്കുകയും ചെയ്തിരുന്നു. ഈ കേസുമായി ബന്ധപ്പെട്ട് ജമ്മു കശ്മീരിലെ വിവിധയിടങ്ങളിൽ റെയ്ഡ് തുടരുന്നതിനിടെയാണ് പുതിയ കസ്റ്റഡി.
ഇതുവരെ 15 പേരെയാണ് അന്വേഷണ സംഘം അറസ്റ്റ് ചെയ്തിരിക്കുന്നത്. മൂന്ന് പേരെ കസ്റ്റഡിയിൽ എടുക്കുകയും ചെയ്തിട്ടുണ്ട്. ഇതിനിടെ ജമ്മു കശ്മീരിൽ ഭീകരർക്കായി വ്യാപക റെയ്‌ഡും തുടരുകയാണ്. സോപോർ, കുൽഗം എന്നിവിടങ്ങളിലായി 230 ഇടങ്ങളിലാണ് റെയ്ഡ് നടക്കുന്നത്. നിരോധിത സംഘടനയായ ജമാഅത്തെ ഇസ്ലാമി (ജെ.ഇ.ഐ) അംഗങ്ങളുടെ വീടുകളിലാണ് റെയ്ഡ് പുരോഗമിക്കുന്നത്.
ചെങ്കോട്ടയ്ക്ക് സമീപമുണ്ടായ സ്ഫോടനവുമായി ബന്ധപ്പെട്ട് ഡൽഹി പോലീസ് ഫരീദാബാദിലെ അൽ ഫലാഹ് സർവ്വകലാശാലയിൽ പരിശോധനകൾ ശക്തമാക്കി. സർവ്വകലാശാലയിലെ പള്ളിയിലെ പുരോഹിതനെ പോലീസ് കസ്റ്റഡിയിലെടുത്തു. ശ്രീനഗർ സ്വദേശി മുഹമ്മദ് ഇഷ്താഖ് ആണ് കസ്റ്റഡിയിലായത്.
സർവകലാശാലയിലെ 70 പേരെ ഇതുവരെ ചോദ്യം ചെയ്തതായും സിസിടിവി ദൃശ്യങ്ങൾ ശേഖരിച്ചതായും പോലീസ് അറിയിച്ചു. സ്ഫോടനത്തിനായി ഉപയോഗിച്ചത് സൈന്യം ഉപയോഗിക്കുന്ന തരം രാസവസ്തുക്കളാണോ എന്ന സംശയം ഉയരുന്നുണ്ട്. സ്ഫോടനം നടന്ന സ്ഥലത്ത് നിന്ന് അമോണിയം നൈട്രേറ്റിന്റെ സാന്നിധ്യം കണ്ടെത്തിയിട്ടുണ്ട്.
മറ്റ് പദാർത്ഥങ്ങൾ ഉപയോഗിച്ചിട്ടുണ്ടോ എന്നത് വിശദമായ പരിശോധനകൾക്ക് ശേഷം മാത്രമേ വ്യക്തമാകൂ. സ്ഫോടനം നടത്തിയ ഉമർ മുഹമ്മദ് സ്ഫോടനത്തിന് മുൻപ് 11 മണിക്കൂറിലധികം ഡൽഹിയിൽ ചെലവഴിച്ചിരുന്നു. കൊണാട്ട് പ്ലേസ് അടക്കമുള്ള നഗരത്തിന്റെ പ്രധാന ഭാഗങ്ങളിൽ ഇയാൾ കറങ്ങിയതായി പോലീസ് വൃത്തങ്ങൾ പറയുന്നു.
ഫരീദാബാദിൽ നിന്ന് അറസ്റ്റുകൾ നടന്ന വിവരം അറിഞ്ഞ ഉമർ പരിഭ്രാന്തനായെന്നും, ഇല്ലെങ്കിൽ ഇതിലും വലിയ ആക്രമണത്തിന് സാധ്യതയുണ്ടായിരുന്നുവെന്നും പോലീസ് വിലയിരുത്തുന്നു. ചെങ്കോട്ടയ്ക്ക് സമീപത്തെ സ്ഫോടനത്തിൽ ദേശീയ അന്വേഷണ ഏജൻസി (എൻഐഎ) അന്വേഷണം ഊർജിതമാക്കി.
കഴിഞ്ഞ ദിവസം ഫരീദാബാദ്, സഹറൻപുർ എന്നിവിടങ്ങളിൽ നിന്ന് അറസ്റ്റിലായ ഡോക്ടർമാരായ ആദിൽ, മുസ്മീൽ, ഷഹീനാ എന്നിവരെ എൻഐഎ കസ്റ്റഡിയിൽ എടുത്ത് ചോദ്യം ചെയ്യും. ആക്രമണത്തിൽ പാക് ഭീകര സംഘടനയായ ജയ്ഷെ മുഹമ്മദിന്റെ (ജെ.ഇ.എം.) പങ്ക് സംശയിക്കുന്നുണ്ടെങ്കിലും ഇതുവരെ ഔദ്യോഗികമായി സ്ഥിരീകരിച്ചിട്ടില്ല.
കശ്മീരിലെ പുൽവാമ സ്വദേശി ഡോ. ഉമർ മുഹമ്മദ് നടത്തിയത് ചാവേർ ആക്രമണം ആയിരുന്നില്ലെന്നാണ് പ്രാഥമിക നിഗമനം. റെയ്ഡിൽ സ്ഫോടക വസ്തുക്കൾ കണ്ടെടുത്തത് പ്രതിയെ പരിഭ്രാന്തനാക്കി. നിർമ്മാണം പൂർത്തിയാകാത്ത ബോംബ് അസമയത്ത് പൊട്ടിത്തെറിക്കുകയായിരുന്നുവെന്നും ഉന്നത വൃത്തങ്ങളെ ഉദ്ധരിച്ച് വാർത്താ ഏജൻസി റിപ്പോർട്ട് ചെയ്തിരുന്നു. കാർ ഒരു ലക്ഷ്യത്തിലേക്ക് കുതിക്കുകയോ മനഃപൂർവ്വം ഇടിക്കുകയോ ചെയ്തിരുന്നത് ചാവേർ ആക്രമണത്തിന്റെ രീതിക്ക് വിരുദ്ധമാണെന്നും റിപ്പോർട്ടിൽ പറയുന്നു.