അഹമ്മദാബാദ് : ഗുജറാത്തിലെ അഹമ്മദാബാദിലെ വാടക വീട്ടിൽ മൂന്ന് കുട്ടികൾ ഉൾപ്പെടെ അഞ്ച് പേർ വിഷവസ്തു കഴിച്ച് ആത്മഹത്യ ചെയ്തതായി പോലീസ് ഞായറാഴ്ച അറിയിച്ചു. വിപുല്‍ കാഞ്ചി വഗേല (34), ഭാര്യ സോണാൽ വഗേല (26), 11 ഉം 5 ഉം വയസ്സുള്ള രണ്ട് പെൺമക്കൾ, 8 വയസ്സുള്ള ഒരു മകൻ എന്നിവരാണ് മരിച്ചത്.(Family of five, including three children, die by suicide in Ahmedabad)
അഹമ്മദാബാദ് ജില്ലയിലെ ധോൽക്ക എന്ന പട്ടണത്തിൽ നിന്നുള്ള കുടുംബമാണിതെന്ന് വാർത്താ ഏജൻസി റിപ്പോർട്ട് ചെയ്തു. പ്രഥമദൃഷ്ട്യാ, നഗരത്തിനടുത്തുള്ള ബാവ്‌ലയിലെ ഫ്ലാറ്റിനുള്ളിൽ വിഷം കഴിച്ച് കുടുംബം ആത്മഹത്യ ചെയ്തതായി പോലീസ് കരുതുന്നു. ബഗോദര ഗ്രാമത്തിലാണ് സംഭവം നടന്നതെന്നും പുലർച്ചെ രണ്ട് മണിയോടെയാണ് പോലീസിന് വിവരം ലഭിച്ചതെന്നും അഹമ്മദാബാദ് (റൂറൽ) പോലീസ് സൂപ്രണ്ട് ഓം പ്രകാശ് ജാട്ട് പറഞ്ഞു.
ഗൃഹനാഥൻ ഉപജീവനത്തിനായി ഓട്ടോറിക്ഷ ഓടിച്ചിരുന്നു. മൃതദേഹങ്ങൾ പോസ്റ്റ്‌മോർട്ടത്തിനായി പ്രാദേശിക ആശുപത്രിയിലേക്ക് അയച്ചിട്ടുണ്ടെന്ന് ഉദ്യോഗസ്ഥർ കൂട്ടിച്ചേർത്തു.