ന്യൂഡൽഹി: ശ്രീലങ്കയിൽ കനത്ത നാശം വിതച്ച് 'ഡിറ്റ് വാ' ചുഴലിക്കാറ്റ് തമിഴ്നാട് തീരത്തേക്ക് നീങ്ങുന്നു. ദ്വീപ് രാജ്യത്തെ ദുരിതക്കയത്തിലാഴ്ത്തിയ ചുഴലിക്കാറ്റിൽ മരണസംഖ്യ 50 കടന്നു. ശ്രീലങ്കൻ സർക്കാരിന്റെ അഭ്യർത്ഥന പ്രകാരം ഇന്ത്യയുടെ വിമാനവാഹിനി കപ്പലായ ഐ.എൻ.എസ്. വിക്രാന്തും രക്ഷാദൗത്യത്തിൽ പങ്കുചേർന്നിട്ടുണ്ട്. രണ്ട് ദിവസമായി തുടരുന്ന അതിതീവ്ര മഴയും പ്രളയവും മണ്ണിടിച്ചിലും കാരണം ശ്രീലങ്കയിലെ 25 ജില്ലകളിൽ 20-ലും ജനജീവിതം നിശ്ചലമായി.(Cyclone Ditwah hits Sri Lanka, death toll rises to 56)
മണ്ണിടിച്ചിലിലും പ്രളയത്തിലും 56 പേർ മരിക്കുകയും 25 പേരെ കാണാതാവുകയും ചെയ്തതായി ഔദ്യോഗിക അറിയിപ്പുണ്ട്. 44,000 പേരെ പ്രളയം നേരിട്ട് ബാധിച്ചു. നിരവധി റോഡുകളും പാലങ്ങളും ഒലിച്ചുപോയി. വീടുകളുടെ ടെറസുകളിലും മരങ്ങളുടെ മുകളിലും അഭയം തേടിയ പലരെയും വ്യോമസേന ഹെലികോപ്റ്ററുകൾ എത്തി രക്ഷപ്പെടുത്തി.
ലങ്കൻ നാവികസേനയുടെ ക്ഷണപ്രകാരം ബുധനാഴ്ച കൊളംബോ തീരത്തെത്തിയിരുന്ന ഇന്ത്യയുടെ വിമാനവാഹിനി കപ്പലായ ഐ.എൻ.എസ്. വിക്രാന്തും ഇപ്പോൾ രക്ഷാദൗത്യത്തിന്റെ ഭാഗമായിട്ടുണ്ട്. രാജ്യത്ത് രാവിലെ 6 മണി മുതൽ ട്രെയിൻ ഗതാഗതം പൂർണ്ണമായി നിർത്തിവെച്ചിരിക്കുകയാണ്. കൊളംബോ വിമാനത്താവളത്തിലേക്കുള്ള പല വിമാനങ്ങളും തിരുവനന്തപുരത്തേക്കോ കൊച്ചിയിലേക്കോ തിരിച്ചുവിടാൻ അഭ്യർത്ഥിക്കുമെന്ന് ലങ്കൻ സർക്കാർ അറിയിച്ചു.
'ഡിറ്റ് വാ' ചുഴലിക്കാറ്റിന്റെ പശ്ചാത്തലത്തിൽ തമിഴ്നാട്, ആന്ധ്രാ, പുതുച്ചേരി തീരങ്ങളിലും കനത്ത ജാഗ്രതയാണ് പ്രഖ്യാപിച്ചിരിക്കുന്നത്. 'ഡിറ്റ് വായുടെ' സ്വാധീനത്തിൽ തമിഴ്നാട്ടിലെ തെക്കൻ ജില്ലകളിലും പുതുച്ചേരിയിലും അടുത്ത മൂന്ന് ദിവസം മഴ കനക്കുമെന്നാണ് മുന്നറിയിപ്പ്. എൻ.ഡി.ആർ.എഫ്., എസ്.ഡി.ആർ.എഫ്. (ദേശീയ-സംസ്ഥാന ദുരന്ത നിവാരണ സേന) സംഘങ്ങളെ വിവിധ ജില്ലകളിൽ വിന്യസിച്ചിട്ടുണ്ട്. മുൻകരുതലിന്റെ ഭാഗമായി ചെന്നൈയിലെ മൂന്ന് ജലസംഭരണികളായ റെഡ് ഹിൽസ്, പൂണ്ടി, ചെമ്പരമ്പാക്കം എന്നിവിടങ്ങളിൽ നിന്ന് സെക്കൻഡിൽ 200 ഘനയടി വീതം വെള്ളം തുറന്നുവിടുന്നുണ്ട്.