ജയ്പൂർ: നിയമപരമായി വിവാഹ പ്രായം എത്തിയിട്ടില്ലെങ്കിലും, പ്രായപൂർത്തിയായ വ്യക്തികൾക്ക് സ്വന്തം ഇഷ്ടപ്രകാരം ഒരുമിച്ച് ജീവിക്കുന്നതിൽ നിയമപരമായ തടസ്സങ്ങളില്ലെന്ന് രാജസ്ഥാൻ ഹൈക്കോടതിയുടെ സുപ്രധാന നിരീക്ഷണം. വിവാഹ പ്രായത്തിന്റെ മാത്രം അടിസ്ഥാനത്തിൽ പൗരന്റെ ഭരണഘടനാപരമായ അവകാശങ്ങൾ നിയന്ത്രിക്കാൻ കഴിയില്ലെന്നും കോടതി വ്യക്തമാക്കി.(Adults can live together even if they are not of marriageable age, Rajasthan HC)
സ്വന്തം ഇഷ്ടപ്രകാരം 'ലിവ്-ഇൻ' ബന്ധത്തിൽ താമസിക്കാൻ അനുവദിക്കണമെന്ന് ആവശ്യപ്പെട്ട് കോടതിയെ സമീപിച്ച കോട്ടയിൽ നിന്നുള്ള 18 വയസ്സുള്ള യുവതിയും 19 വയസ്സുള്ള യുവാവും സമർപ്പിച്ച സംരക്ഷണ ഹർജി പരിഗണിക്കവെയാണ് ജസ്റ്റിസ് അനൂപ് ധണ്ട് ഈ നിരീക്ഷണം നടത്തിയത്.
2025 ഒക്ടോബർ 27 മുതൽ തങ്ങൾ ലിവ്-ഇൻ കരാറിൽ ഏർപ്പെട്ടതായി ദമ്പതികൾ കോടതിയെ അറിയിച്ചിരുന്നു. യുവതിയുടെ കുടുംബം തങ്ങളുടെ ബന്ധത്തെ എതിർക്കുകയും ഭീഷണി മുഴക്കുകയും ചെയ്തതായും ദമ്പതികൾ ഹർജിയിൽ ആരോപിച്ചു. കോട്ട പോലീസിൽ പരാതി നൽകിയിട്ടും നടപടിയൊന്നും ഉണ്ടായില്ലെന്നും അവർ പറഞ്ഞു.
പുരുഷന് 21 വയസ്സ് തികയാത്തതിനാൽ ലിവ്-ഇൻ റിലേഷനിൽ താമസിക്കാൻ അനുവദിക്കരുതെന്ന് വാദിച്ചുകൊണ്ട് സംസ്ഥാനത്തെ പ്രതിനിധീകരിച്ച അഭിഭാഷകൻ ഹർജിയെ എതിർത്തിരുന്നു. വിവാഹപ്രായത്തിലെത്തിയില്ല എന്നതുകൊണ്ട് മാത്രം ഭരണഘടനയുടെ ആർട്ടിക്കിൾ 21 പ്രകാരമുള്ള ജീവിക്കാനുള്ള അവകാശവും വ്യക്തിസ്വാതന്ത്ര്യവും നിഷേധിക്കാൻ കഴിയില്ലെന്ന് കോടതി വിധിച്ചു. ഇന്ത്യൻ നിയമപ്രകാരം ലിവ്-ഇൻ ബന്ധങ്ങൾ നിരോധിക്കുകയോ കുറ്റകരമാക്കുകയോ ചെയ്തിട്ടില്ലെന്നും, ഓരോ പൗരനെയും സംരക്ഷിക്കാൻ സംസ്ഥാനത്തിന് കടമയുണ്ടെന്നും ജസ്റ്റിസ് ധണ്ട് ചൂണ്ടിക്കാട്ടി.
ഭീഷണി ആരോപണങ്ങൾ പരിശോധിച്ച്, ആവശ്യമെങ്കിൽ ദമ്പതികൾക്ക് ആവശ്യമായ സംരക്ഷണം നൽകാൻ ഭിൽവാര, ജോധ്പൂർ (റൂറൽ) പോലീസ് സൂപ്രണ്ടുമാർക്ക് ജസ്റ്റിസ് ധണ്ട് നിർദ്ദേശം നൽകി.