നടി തുനിഷ ശർമയെ തൂങ്ങി മരിച്ച നിലയിൽ കണ്ടെത്തിയ സ്റ്റുഡിയോയിൽ വൻ തീപിടുത്തം; ദുരൂഹത
May 14, 2023, 15:30 IST
മുംബൈ: നടി തുനിഷ ശർമയെ തൂങ്ങി മരിച്ച നിലയിൽ കണ്ടെത്തിയ മുംബൈ വസായിയിലെ ഭജൻലാൽ സ്റ്റുഡിയോയിൽ തീപിടുത്തം. സ്റ്റുഡിയോ വൻ തീപ്പിടിത്തത്തിൽ ഏറെക്കുറെ പൂർണമായി കത്തിയമർന്നതായാണ് റിപ്പോർട്ട്. വെള്ളിയാഴ്ച അർധരാത്രിയോടെയാണ് ഭജൻലാൽ സ്റ്റുഡിയോയിൽ അഗ്നിബാധയുണ്ടായതെന്ന് അഗ്നിശമന സേനാംഗങ്ങളെ ഉദ്ധരിച്ചുകൊണ്ട് ദേശീയമാധ്യമങ്ങൾ റിപ്പോർട്ട് ചെയ്തു. ശനിയാഴ്ച പുലർച്ചെ നാലുമണിയോടെയാണ് തീ അണച്ചത്. അഗ്നിബാധയുടെ കാരണം വ്യക്തമല്ലെന്ന് വസായ്-വിരാർ സിറ്റി മുനിസിപ്പൽ കോർപ്പറേഷൻ ബ്രിഗേഡ് അധികൃതർ അറിയിച്ചു.അഞ്ചുമാസം മുമ്പാണ് തുനിഷയുടെ മരണം. അഭിനയിച്ചുകൊണ്ടിരുന്ന സീരിയലിന്റെ സെറ്റിൽ തൂങ്ങിമരിച്ച നിലയിലാണ് കണ്ടെത്തിയത്. സംഭവവുമായി ബന്ധപ്പെട്ട് ആലിബാബ-ദാസ്താൻ ഇ കാബൂളിലെ സഹതാരം ഷീസാൻ ഖാനെ പോലീസ് അറസ്റ്റ് ചെയ്തിരുന്നു. തുനിഷയും ഷീസാനും പ്രണയത്തിലായിരുന്നുവെന്നും ഈ ബന്ധം തകർന്നതാണ് നടിയെ ആത്മഹത്യയിലേക്ക് നയിച്ചതെന്നുമാണ് പുറത്തുവന്ന റിപ്പോർട്ട്.