കലബുറഗി: കർണാടകയിൽ കാർ അപകടത്തിൽപ്പെട്ട് ഐ.എ.എസ്. ഉദ്യോഗസ്ഥനും അദ്ദേഹത്തിന്റെ രണ്ട് സഹോദരന്മാരും മരിച്ചു. കർണാടക സ്റ്റേറ്റ് മിനറൽസ് കോർപ്പറേഷന്റെ മാനേജിംഗ് ഡയറക്ടറുടെ (എം.ഡി.) ചുമതല വഹിച്ചിരുന്ന 2012 ബാച്ച് ഐ.എ.എസ്. ഉദ്യോഗസ്ഥനായ മഹന്തേഷ് ബിലഗി (51) ആണ് മരിച്ചത്.(3 people including IAS officer die in road accident in Karnataka)
ചൊവ്വാഴ്ച ജെവാർഗി താലൂക്കിലെ ഗൗനള്ളി ക്രോസിന് സമീപമാണ് വാഹനാപകടമുണ്ടായത്. ഇവർ സഞ്ചരിച്ച ഇന്നോവ കാർ ജെവാർഗി ബൈപാസിന് സമീപം വെച്ച് മറിയുകയായിരുന്നു.
വിജയപുരയിൽ നിന്ന് കലബുറഗിയിലേക്ക് പോവുകയായിരുന്നു മഹന്തേഷ് ബിലഗിയും അദ്ദേഹത്തിന്റെ സഹോദരങ്ങളായ ശങ്കർ ബിലാഗി (55), ഈരണ്ണ ബിലാഗി (53) എന്നിവരും ഈരണ്ണ സിരസംഗി എന്ന മറ്റൊരാളും. ശങ്കർ ബിലാഗിയും ഈരണ്ണ ബിലാഗിയും സംഭവസ്ഥലത്തുവെച്ച് തന്നെ മരിച്ചു.
ഗുരുതരമായി പരിക്കേറ്റ മഹന്തേഷ് ബിലഗിയെ ഉടൻ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കാർ ഓടിച്ചിരുന്ന ഡ്രൈവർക്ക് നിസ്സാര പരിക്കുകളോടെ രക്ഷപ്പെടാനായി. ബെലഗാവി ജില്ലയിലെ രാമദുർഗ സ്വദേശിയാണ് മഹന്തേഷ് ബിലഗി. കർണാടക സ്റ്റേറ്റ് മിനറൽസ് കോർപ്പറേഷന്റെ എം.ഡി.യായി ചുമതലയേൽക്കുന്നതിന് മുമ്പ് അദ്ദേഹം ബെസ്കോമിന്റെ (BESCOM) മാനേജിംഗ് ഡയറക്ടറായിരുന്നു. കൂടാതെ, ഉഡുപ്പി, ദാവണഗരെ, ചിത്രദുർഗ എന്നിവിടങ്ങളിൽ വിവിധ തസ്തികകളിൽ അദ്ദേഹം സേവനമനുഷ്ഠിച്ചിട്ടുണ്ട്.