ലഖ്നൗ: ഭക്തിയുടെ അത്യപൂർവമായ കാഴ്ച്ചക്ക് സാക്ഷ്യം വഹിച്ച് ഉത്തർപ്രദേശിലെ ബദൗൺ ജില്ല. 28-കാരിയായ പിങ്കി ശർമ്മ പരമ്പരാഗത ഹൈന്ദവാചാരങ്ങൾ പാലിച്ച് കൃഷ്ണവിഗ്രഹത്തെ വിവാഹം ചെയ്തു. ശനിയാഴ്ച നടന്ന ചടങ്ങിൽ, പിങ്കി കൃഷ്ണവിഗ്രഹത്തെ മടിയിൽ വെച്ച് ഏഴ് ചുവടുകൾ ഉൾപ്പെടെ വിവാഹത്തിന്റെ എല്ലാ ആചാരങ്ങളും പൂർത്തിയാക്കി. അടുത്ത ദിവസം ഒരു വധുവിനെപ്പോലെ പിങ്കിയുടെ യാത്രയയപ്പും ഗ്രാമത്തിന്റെ അകമ്പടിയോടെ നടന്നു.(28-year-old woman marries Krishna idol in Uttar Pradesh)
കൃഷ്ണൻ്റെ ബന്ധുക്കളുടെ പങ്ക് വഹിക്കാൻ ഗ്രാമം ഒന്നടങ്കം വിവാഹത്തിനെത്തി. പിങ്കിയുടെ ഭർതൃസഹോദരനായ ഇന്ദ്രേഷ് ശർമ്മ കൃഷ്ണൻ്റെ 'ബരാത്തി' ആയി ചടങ്ങുകളിൽ പങ്കെടുത്തു. ഇതൊരു വ്യക്തിപരമായ തീരുമാനമല്ലെന്നും ദൈവികമായ ഒരു സന്ദേശമായിട്ടാണ് താൻ ഈ വിവാഹത്തെ കാണുന്നതെന്നും പിങ്കി വ്യക്തമാക്കി. മൂന്നുമാസം മുൻപ് വൃന്ദാവനത്തിലെ ബാങ്കെ ബിഹാരി ക്ഷേത്രം സന്ദർശിച്ചപ്പോൾ പ്രസാദമായി ഒരു സ്വർണ്ണ മോതിരം ലഭിച്ചതാണ് ഈ വഴിത്തിരിവിന് കാരണം.
"ഈ മോതിരം കൃഷ്ണൻ തന്നെ നൽകിയ സ്വീകാര്യതയുടെ സന്ദേശമായിട്ടാണ് ഞാൻ കരുതുന്നത്. ആ നിമിഷം മുതൽ എൻ്റെ ഭക്തി വർധിച്ചു." വൃന്ദാവനത്തിൽ താമസിക്കാനും ജീവിതം മുഴുവൻ ആരാധനയ്ക്കും ധ്യാനത്തിനും ആത്മീയ സേവനത്തിനുമായി സമർപ്പിക്കാനുമാണ് പിങ്കിയുടെ ആഗ്രഹം. "ചെലവുകളെയോ ഉപജീവനത്തെയോ കുറിച്ച് എനിക്ക് ആശങ്കയില്ല, എല്ലാം കൃഷ്ണൻ നോക്കിക്കോളുമെന്ന് ഞാൻ വിശ്വസിക്കുന്നു," അവർ കൂട്ടിച്ചേർത്തു.
വർഷങ്ങളായി പിങ്കിക്ക് അനുയോജ്യനായ വരനെ കുടുംബം അന്വേഷിച്ചിരുന്നുവെങ്കിലും, കൃഷ്ണൻ്റെ ആഗ്രഹപ്രകാരമേ കാര്യങ്ങൾ നടക്കൂ എന്നായിരുന്നു പിങ്കിയുടെ മറുപടി. പിങ്കിയുടെ അചഞ്ചലമായ വിശ്വാസവും സ്വർണ്ണ മോതിരം ലഭിച്ച സംഭവവും കണ്ടതിന് ശേഷം കുടുംബം ഒടുവിൽ ഈ തീരുമാനത്തിന് പിന്തുണ നൽകി.
വിവാഹത്തിന് പത്ത് ദിവസം മുൻപ് തന്നെ അവർ വിഗ്രഹം കൊണ്ടുവരാൻ വൃന്ദാവനത്തിലേക്ക് പോയിരുന്നു. ചടങ്ങുകൾക്ക് നേതൃത്വം നൽകിയ പണ്ഡിറ്റ് രാംശങ്കർ മിശ്ര, പൂർണ്ണ സമ്മതത്തോടെയാണ് വിവാഹം നടന്നതെന്നും ഭക്തിക്ക് വലിയ ശക്തിയുണ്ടെന്നും പറഞ്ഞു. നിലവിൽ, കൃഷ്ണൻ്റെ കുടുംബമായി കണക്കാക്കുന്ന സഹോദരി ഭര്ത്താവിന്റെ വീട്ടിലാണ് പിങ്കി കഴിയുന്നത്. ഗ്രാമവാസികൾ സ്നേഹത്തോടെ പിങ്കിയെ ഇപ്പോൾ 'മീര' എന്ന് വിളിക്കുന്നു. ലൗകികമായ കാര്യങ്ങളെല്ലാം ഉപേക്ഷിച്ച് ഭക്തിയുടെ പാതയിൽ മുന്നോട്ട് പോകാനും കൃഷ്ണൻ്റെ സ്നേഹത്തിലും മാർഗ്ഗനിർദ്ദേശത്തിലും മുഴുകി ജീവിക്കാനുമാണ് താൻ ആഗ്രഹിക്കുന്നതെന്നും പിങ്കി പറഞ്ഞു.