തിരുവനന്തപുരം: തദ്ദേശ സ്വയംഭരണ തിരഞ്ഞെടുപ്പിന്റെ ആദ്യഘട്ട വോട്ടെടുപ്പ് ആരംഭിച്ചതിന് പിന്നാലെ സംസ്ഥാനത്തെ പല ബൂത്തുകളിലും വോട്ടിങ് മെഷീനുകൾ തകരാറിലായത് പോളിങ് വൈകാൻ കാരണമായി. പലയിടത്തും സാങ്കേതിക പ്രശ്നങ്ങൾ പരിഹരിച്ച ശേഷം മാത്രമാണ് വോട്ടെടുപ്പ് സാധാരണ നിലയിലായത്.(Voting machine malfunctions, Voting delayed in many places)
കൊല്ലം കോർപറേഷനിലെ ഭരണിക്കാവ് ഡിവിഷൻ ഒന്നാം നമ്പർ ബൂത്തിൽ വോട്ടിങ് മെഷീൻ തകരാറിലായതിനെ തുടർന്ന് വൈകിയാണ് പോളിങ് ആരംഭിക്കാനായത്. പത്തനംതിട്ട തിരുവല്ല നിരണം എരതോട് ബൂത്തിൽ യന്ത്രത്തകരാർ കാരണം വോട്ടിങ് തുടങ്ങാൻ കഴിഞ്ഞില്ല. പ്രശ്നം പരിഹരിക്കാനുള്ള ശ്രമങ്ങൾ തുടരുകയാണ്. പത്തനംതിട്ട നഗരസഭയിലെ ടൗൺ സ്ക്വയർ വാർഡിലും വോട്ടിങ് മെഷീൻ തകരാർ റിപ്പോർട്ട് ചെയ്തിരുന്നു.
ഇടുക്കി വണ്ടിപ്പെരിയാർ തങ്കമലയിലെ ബൂത്തിലും വോട്ടിങ് യന്ത്രം തകരാറിലായി. ഉടൻ തന്നെ പകരം യന്ത്രം എത്തിച്ച് വോട്ടെടുപ്പ് പുനഃരാരംഭിച്ചു. എറണാകുളം മൂവാറ്റുപുഴ നഗരസഭയിലെ ബൂത്തിലും വോട്ടിങ് മെഷീൻ തകരാർ കാരണം പോളിങ് തടസ്സപ്പെട്ടു. സാങ്കേതിക തകരാറുകൾ പരിഹരിച്ച് പരമാവധി വേഗത്തിൽ വോട്ടെടുപ്പ് പുനഃരാരംഭിക്കാനുള്ള ശ്രമങ്ങൾ അതത് പോളിങ് ഓഫീസർമാരുടെ നേതൃത്വത്തിൽ പുരോഗമിക്കുകയാണ്.