പാലക്കാട്: തദ്ദേശ തെരഞ്ഞെടുപ്പ് അടുത്തിരിക്കെ പാലക്കാട് നഗരസഭയിൽ സ്ഥാനാർഥി നിർണയത്തെച്ചൊല്ലിയുള്ള ബിജെപിയിലെ ആഭ്യന്തര തർക്കം രൂക്ഷമാകുന്നു. പാർട്ടിയിലെ വിഭാഗീയത മുന്നണിയുടെ കണക്കുകൂട്ടലുകൾക്ക് തിരിച്ചടിയാകുമെന്ന ആശങ്കയും സജീവമാണ്.(Palakkad BJP East District President expresses willingness to contest for the municipality)
ബിജെപി പാലക്കാട് ഈസ്റ്റ് ജില്ലാ പ്രസിഡന്റ് പ്രശാന്ത് ശിവൻ നഗരസഭയിലേക്ക് മത്സരിക്കാൻ സന്നദ്ധത അറിയിച്ചു. ശ്രീറാം പാളയം വാർഡിൽ മത്സരിക്കാനാണ് അദ്ദേഹം താൽപ്പര്യം പ്രകടിപ്പിച്ചത്. ജില്ലാ കമ്മിറ്റി സമർപ്പിച്ച പ്രാഥമിക പട്ടികയിൽ മറ്റൊരു വാർഡിലും പ്രശാന്ത് ശിവന്റെ പേര് ഉൾപ്പെടുത്തിയിട്ടുണ്ട്. മിനി കൃഷ്ണകുമാറും ആദ്യഘട്ട സ്ഥാനാർഥി പട്ടികയിൽ ഇടം നേടി.
നിലവിലെ സ്ഥാനാർഥി പട്ടികയിൽനിന്ന് മുതിർന്ന നേതാക്കൾ ഒഴിവാക്കപ്പെട്ടതാണ് ഭിന്നതയുടെ പ്രധാന കാരണം. നിലവിലെ ചെയർപേഴ്സൺ പ്രമീള ശശിധരൻ, വൈസ് ചെയർമാൻ ഇ. കൃഷ്ണദാസ് എന്നിവരെ ആദ്യഘട്ട പട്ടികയിൽ ഉൾപ്പെടുത്തിയിട്ടില്ല. മുതിർന്ന നേതാവ് ശിവരാജനെയും സ്ഥാനാർഥി പട്ടികയിൽ നിന്ന് ഒഴിവാക്കി.
ഇതുമായി ബന്ധപ്പെട്ട് നിലവിൽ പല സീറ്റുകളിലും കടുത്ത തർക്കങ്ങൾ ഉടലെടുത്തിരിക്കുകയാണ്. പാലക്കാട് നഗരസഭയിലെ ബിജെപി പ്രശ്നങ്ങൾക്കൊപ്പം മറ്റ് മുന്നണികളിലും വിഭാഗീയ പ്രശ്നങ്ങളും കൂറുമാറ്റവും സജീവമാണ്. പാലക്കാട് നഗരസഭയിലെ കടുത്ത വിഭാഗീയ പ്രശ്നങ്ങൾ ജില്ലയിൽ ബിജെപിക്ക് തിരിച്ചടിയാകാൻ സാധ്യതയുണ്ട്.