കൽപ്പറ്റ: വയനാട് ജില്ലാ പഞ്ചായത്തിലേക്കുള്ള തദ്ദേശ തിരഞ്ഞെടുപ്പിൽ മത്സരിക്കുന്ന എൽ.ഡി.എഫ്. സ്ഥാനാർത്ഥികളെ പ്രഖ്യാപിച്ചു. ആകെയുള്ള 17 സീറ്റുകളിൽ കക്ഷികൾ തമ്മിലുള്ള സീറ്റ് വിഭജനം പൂർത്തിയാക്കി. ജില്ലാ പഞ്ചായത്തിലെ 17 സീറ്റുകൾ വിവിധ കക്ഷികൾ പങ്കിട്ടെടുത്തു.(Local body elections, LDF candidates for Wayanad district panchayat announced )
സി.പി.എം. 11 സീറ്റുകൾ, സി.പി.ഐ. 2 സീറ്റുകൾ, ആർ.ജെ.ഡി. 2 സീറ്റുകൾ, എൻ.സി.പി. 1 സീറ്റ്, കേരള കോൺഗ്രസ് (എം) 1 സീറ്റ് എന്നിങ്ങനെയാണിത്. സി.പി.എമ്മിന്റെ സിറ്റിങ് സീറ്റായ കണിയാംപറ്റ ഇത്തവണ കേരള കോൺഗ്രസ് (എം)ന് വിട്ടുനൽകിയാണ് സീറ്റ് ധാരണ പൂർത്തിയാക്കിയത്.
സി.പി.എം. നിരയിലെ പ്രമുഖ സ്ഥാനാർത്ഥികൾ ജിതിൻ കെ.ആർ, എൻ.പി. കുഞ്ഞുമോൾ, റഹീമ വാളാട് (എഴുത്തുകാരി) എന്നിവരാണ്. പിണറായി സർക്കാരിന്റെ വികസന നേട്ടങ്ങൾ അണിനിരത്തിയാണ് ഇത്തവണ എൽ.ഡി.എഫിന്റെ പ്രചാരണം. വയനാട്ടിൽ ഇടതുമുന്നണിയുടെ പ്രകടന പത്രിക 21-ന് പുറത്തിറക്കും.
കഴിഞ്ഞ തദ്ദേശ തിരഞ്ഞെടുപ്പിൽ എൽ.ഡി.എഫും യു.ഡി.എഫും ഒപ്പത്തിനൊപ്പം എത്തിയതിനെ തുടർന്ന് നറുക്കെടുപ്പിലൂടെയാണ് ജില്ലാ പഞ്ചായത്ത് പ്രസിഡന്റ് സ്ഥാനം യു.ഡി.എഫ്. സ്വന്തമാക്കിയത്.