കോട്ടയം: കേരള കോൺഗ്രസ് (എം) പാർട്ടിയുടെ തദ്ദേശ സ്വയംഭരണ തിരഞ്ഞെടുപ്പ് പ്രചാരണത്തിലെ പ്രധാന ആകർഷണമായി മാറിയിരിക്കുകയാണ് ചെയർമാൻ ജോസ് കെ. മാണിയുടെ മകൻ കെ.എം. മാണി ജൂനിയർ. സംസ്ഥാന രാഷ്ട്രീയത്തിൽ സജീവമാകുന്നു എന്ന അഭ്യൂഹങ്ങൾക്കിടെയാണ് മാണി ജൂനിയർ തിരഞ്ഞെടുപ്പ് പ്രചാരണത്തിൽ മുഴുവൻ സമയ സാന്നിധ്യമാകുന്നത്.( Jose K Mani's son becomes the Star campaigner of local body elections)
കേരള കോൺഗ്രസ് (എം) സ്ഥാനാർത്ഥികൾ മത്സരിക്കുന്ന വിവിധ വാർഡുകളിൽ കെ.എം. മാണി ജൂനിയർ വീടുകൾ കയറിയുള്ള പ്രചാരണത്തിലാണ് ശ്രദ്ധ കേന്ദ്രീകരിക്കുന്നത്. നേതാക്കൾക്കും അണികൾക്കുമിടയിൽ 'കുഞ്ഞുമാണി' എന്നറിയപ്പെടുന്ന ഇദ്ദേഹം, ആളുകളുമായി നേരിട്ട് ഇടപെഴകുന്ന ശൈലിയാണ് പിന്തുടരുന്നത്. ഇത്, അന്തരിച്ച കെ.എം. മാണിയുടെയും ജോസ് കെ. മാണിയുടെയും പ്രചാരണ ശൈലിയെ ഓർമ്മിപ്പിക്കുന്നതാണ്.
ബെംഗളൂരുവിലെ ജോലി ഉപേക്ഷിച്ചാണ് മാണി ജൂനിയർ തിരഞ്ഞെടുപ്പ് പ്രചാരണത്തിനായി നാട്ടിൽ മുഴുവൻ സമയവും എത്തിയിരിക്കുന്നത്. യൂത്ത് ഫ്രണ്ട് പ്രവർത്തനങ്ങളിലും കുറച്ച് നാളുകളായി അദ്ദേഹം മുൻനിരയിൽ സജീവമാണ്.
നിയമസഭാ തിരഞ്ഞെടുപ്പിൽ ജോസ് കെ. മാണിയെ കൈവിട്ട പാലാ മണ്ഡലത്തിൽ, കെ.എം. മാണിയുടെ പൈതൃകം തുടരാൻ മാണി ജൂനിയർ രംഗത്തിറങ്ങണമെന്ന് ആഗ്രഹിക്കുന്ന ഒരു വിഭാഗം കേരള കോൺഗ്രസ് പ്രവർത്തകരും അണികളും പാർട്ടിയിലുണ്ട്. തദ്ദേശ തിരഞ്ഞെടുപ്പിലെ സജീവ ഇടപെടൽ, ഭാവിയിൽ സംസ്ഥാന രാഷ്ട്രീയത്തിൽ അദ്ദേഹത്തിന്റെ പങ്ക് വർദ്ധിപ്പിക്കാനുള്ള സൂചനയായി രാഷ്ട്രീയ നിരീക്ഷകർ വിലയിരുത്തുന്നു. പ്രചാരണത്തിൽ മുതിർന്ന കേരള കോൺഗ്രസ് (എം) നേതാക്കളും അദ്ദേഹത്തിന് ഒപ്പമുണ്ട്.