പാലക്കാട്: യൂത്ത് കോൺഗ്രസ് അധ്യക്ഷ സ്ഥാനത്തുനിന്ന് രാജിവെക്കുകയും പാർട്ടിയിൽനിന്ന് സസ്പെൻഡ് ചെയ്യപ്പെടുകയും ചെയ്ത എം.എൽ.എ. രാഹുൽ മാങ്കൂട്ടത്തിൽ തന്റെ നിലപാടുകൾ വ്യക്തമാക്കി. കോൺഗ്രസ് നേതാക്കൾ പറയുന്ന കാര്യങ്ങൾ താൻ അനുസരിക്കുന്നുണ്ടെന്ന് അദ്ദേഹം പറഞ്ഞു.(Will obey the leaders, says Rahul Mamkootathil)
സണ്ണി ജോസഫ്, രമേശ് ചെന്നിത്തല, കെ. സുധാകരൻ, കെ.സി. വേണുഗോപാൽ, വി.ഡി. സതീശൻ എന്നിവരെല്ലാം തന്റെ നേതാക്കളാണെന്നും അവരുടെ നിർദ്ദേശങ്ങൾ അനുസരിക്കുന്നുണ്ടെന്നും രാഹുൽ പറഞ്ഞു. സസ്പെൻഷനിലുള്ള ആൾ പാർട്ടി പരിപാടിയിൽ പങ്കെടുക്കരുതെന്നാണ് നേതാക്കൾ പറഞ്ഞത്. അതിനാൽ, താൻ പാർട്ടി പരിപാടികളിൽ പങ്കെടുക്കുന്നില്ലെന്നും സസ്പെൻഷൻ കാലത്ത് പാലിക്കേണ്ട അച്ചടക്കം പാലിച്ചാണ് മുന്നോട്ട് പോകുന്നതെന്നും അദ്ദേഹം കൂട്ടിച്ചേർത്തു.
കഴിഞ്ഞ തവണ നിയമസഭാ തിരഞ്ഞെടുപ്പിൽ തന്നെ വിജയിപ്പിക്കാൻ കഷ്ടപ്പെട്ടവർക്കുവേണ്ടിയാണ് വോട്ട് തേടി വീടുകയറുന്നത്. അവരുടെ ആവശ്യം നിറവേറ്റേണ്ട ബാധ്യത രാഷ്ട്രീയമായി തനിക്കുണ്ടെന്ന് അദ്ദേഹം പറഞ്ഞു. പദവിക്കുവേണ്ടി വീടുകയറി തുടങ്ങിയ ആളല്ല താനെന്നും വോട്ടില്ലാത്ത കാലത്തുപോലും പാർട്ടിക്കുവേണ്ടി പ്രചാരണത്തിനായി വീടുകയറിയ ആളാണെന്നും അദ്ദേഹം വ്യക്തമാക്കി. ഈ ശീലം "രണ്ടു കാലും കുത്തി നടക്കാൻ കഴിയുന്നിടത്തോളം കാലം" തുടരുമെന്നും പദവിയുണ്ടെങ്കിലും ഇല്ലെങ്കിലും ഇത് തുടരുമെന്നും രാഹുൽ പറഞ്ഞു.
യുവതി ദുരനുഭവമുണ്ടായെന്ന് വെളിപ്പെടുത്തിയതിനെ തുടർന്നും, പിന്നാലെ പുറത്തുവന്ന സന്ദേശങ്ങളുടെ അടിസ്ഥാനത്തിലും രാഹുൽ യൂത്ത് കോൺഗ്രസ് അധ്യക്ഷ സ്ഥാനം രാജിവെച്ചിരുന്നു. എം.എൽ.എ. സ്ഥാനവും രാജിവെക്കണമെന്ന് പാർട്ടിക്കുള്ളിൽ അഭിപ്രായം ഉയർന്നിരുന്നുവെങ്കിലും തൽക്കാലം സസ്പെൻഡ് ചെയ്യാൻ തീരുമാനിക്കുകയായിരുന്നു.
ആരോപണത്തിന്റെ അടിസ്ഥാനത്തിൽ കഴിഞ്ഞ ഓഗസ്റ്റിൽ രാഹുലിനെതിരെ ക്രൈംബ്രാഞ്ച് രജിസ്റ്റർ ചെയ്ത കേസിന്റെ അന്വേഷണം വഴിമുട്ടി നിൽക്കുകയാണ്. ഇരയായ യുവതി പരാതിയോ മൊഴിയോ നൽകാൻ തയ്യാറാകാത്തതിനാലാണ് കേസ് മുന്നോട്ട് പോകാത്തത്. രാഹുൽ ലൈംഗികച്ചുവയോടെ സംസാരിച്ചുവെന്ന് കാട്ടി ഏതാനും പേർ പരാതി നൽകിയിരുന്നു.
അതേസമയം, രാഹുൽ മാങ്കൂട്ടത്തിലിനെ പരസ്യമായി അനുകൂലിച്ച കെ. സുധാകരന്റെ നിലപാടിനെ തള്ളി കെ. മുരളീധരൻ രംഗത്ത്. രാഹുലിന് നിലവിൽ പാർട്ടി പരിപാടികളിൽ നേതാക്കളോടൊപ്പം വേദി പങ്കിടാൻ അനുമതിയില്ലെന്ന് മുരളീധരൻ വ്യക്തമാക്കി. രാഹുൽ മാങ്കൂട്ടത്തിൽ നിലവിൽ സസ്പെൻഷനിലാണ്. അതിനാൽ നേതാക്കളോടൊപ്പം വേദി പങ്കിടാൻ രാഹുലിന് അനുമതിയില്ല.
കെ. സുധാകരന്റെ അനുകൂല പരാമർശത്തിൽ പാർട്ടി അന്വേഷണം നടക്കുകയാണെന്നും മുരളീധരൻ പ്രതികരിച്ചു. "പെൺകുട്ടി ധൈര്യമായി മുന്നോട്ടുവരട്ടെ. നിലവിൽ ചാനലിലെ ശബ്ദം മാത്രമേയുള്ളൂ. പെൺകുട്ടി മുന്നോട്ട് വന്നാൽ പൊതുസമൂഹം പിന്തുണ നൽകും," അദ്ദേഹം പറഞ്ഞു. ഓരോ പ്രദേശത്തും ആരൊക്കെ പ്രചാരണത്തിന് ഇറങ്ങണമെന്ന് അവിടുത്തെ സ്ഥാനാർത്ഥികളാണ് തീരുമാനിക്കുക എന്നും മുരളീധരൻ കൂട്ടിച്ചേർത്തു.
മുതിർന്ന കോൺഗ്രസ് നേതാവായ കെ. സുധാകരൻ ഇന്നലെയാണ് രാഹുൽ മാങ്കൂട്ടത്തിലിനെ ശക്തമായി പിന്തുണച്ച് രംഗത്തെത്തിയത്. രാഹുൽ നിരപരാധിയാണെന്നും അദ്ദേഹത്തെ അവിശ്വസിച്ചത് തെറ്റായിപ്പോയെന്നും സുധാകരൻ അഭിപ്രായപ്പെട്ടു. രാഹുൽ സജീവമാകണമെന്ന് ആവശ്യപ്പെട്ട സുധാകരൻ, താൻ രാഹുലുമായി വേദി പങ്കിടുമെന്നും വ്യക്തമാക്കിയിരുന്നു.
അതേസമയം, രാഹുൽ മാങ്കൂട്ടത്തിനെതിരായ ഗർഭഛിദ്ര ആരോപണത്തിൽ ഇരയായ യുവതി രേഖാമൂലം പരാതി നൽകിയാൽ മാത്രമേ മുന്നോട്ട് പോകാനാവൂ എന്ന നിലപാടിലാണ് ക്രൈംബ്രാഞ്ച്. സ്ത്രീകളെ ശല്യം ചെയ്തതിന് സ്വമേധയാ എടുത്ത കേസിൽ പെൺകുട്ടിയുടെ മൊഴിയെടുത്തുവെങ്കിലും രാഹുലിനെതിരെ ഇതുവരെ യുവതി പരാതി ഉന്നയിച്ചിട്ടില്ല. പുതിയ ശബ്ദരേഖകൾ പുറത്തുവന്ന സാഹചര്യത്തിൽ യുവതി പരാതിയുമായി എത്തുമോ എന്നാണ് ക്രൈംബ്രാഞ്ച് വൃത്തങ്ങൾ ഉറ്റുനോക്കുന്നത്.
ശബരിമല സ്വർണക്കൊള്ളക്കേസുമായി ബന്ധപ്പെട്ടും കെ. മുരളീധരൻ പ്രതികരിച്ചു. തന്ത്രിമാർ കുറ്റക്കാരാണെന്ന് കരുതുന്നില്ലെന്നും, തന്ത്രിമാരെ ചാരി യഥാർത്ഥ പ്രതികൾ രക്ഷപ്പെടാൻ ശ്രമിക്കരുതെന്നും അദ്ദേഹം കൂട്ടിച്ചേർത്തു.